Ichki ishlar vazirligi rahbariyati ishtirokida jinoyatchilik sarhisobi, xizmat intizomi hamda ommaviy tadbirlarda xavfsizlikni taʼminlashga doir kompleks masalalar muhokama qilindi
2026-02-11 13:20:00 / Yangiliklar
Joriy yilning 10-fevral kuni Oʻzbekiston Respublikasi Ichki ishlar vaziri Aziz Tashpulatov rahbarligida videoselektor yigʻilishi boʻlib oʻtdi.
Unda vazir oʻrinbosarlari, sohaviy xizmatlar rahbarlari hamda hududlardan Qoraqalpogʻiston Respublikasi ichki ishlar vaziri, Toshkent shahri va viloyatlar IIBB–IIB boshliqlari, ularning oʻrinbosarlari hamda barcha sohaviy xizmatlar rahbarlari ishtirok etdilar.
Yigʻilishning kun tartibiga muvofiq Davlat rahbarining topshiriqlarini ijrosini taʼminlash jarayonlari, xususan mamlakatimiz hududlarida, xususan Chilonzor tumanida “poytaxt namunasi” asosida mahallalarda kriminogen vaziyatni yaxshilashga qaratilgan masalalar muhokama qilindi.
Taʼkidlanganidek, “poytaxt namunasi” doirasida har bir mahalla kesimida aniq tahlillar olib borish, “xavf guruhi”ga kiruvchi shaxslar bilan manzilli ishlash, yoshlar oʻrtasida jinoyatchilik va huquqbuzarliklarning oldini olishga qaratilgan profilaktik chora-tadbirlarni tizimli yoʻlga qoʻyish muhim ahamiyat kasb etadi. Shuningdek, ijtimoiy himoyaga muhtoj oilalar, ishsiz fuqarolar va taʼlim muassasalaridagi yoshlar bilan yaqin hamkorlikni yoʻlga qoʻyish orqali jinoyatchilikka moyillikni bartaraf etish choralari belgilab olindi.
Shuningdek, ichki ishlar organlari tizimida fuqarolar murojaatlari bilan ishlashning holati atroflicha tahlil qilindi, mavjud kamchiliklar tanqidiy koʻrib chiqildi. Kelgusida murojaatlarni oʻz vaqtida, qonuniy va xolisona koʻrib chiqish, aholi bilan muloqotni yanada kuchaytirish hamda fuqarolar ishonchini oshirishga qaratilgan ustuvor vazifalar belgilandi.
Shu bilan birga, muqaddas “Ramazon” oyi davomida, ayniqsa “Tarovih” namozlari vaqtida jamoat joylarida xavfsizlikni taʼminlash, yoʻl harakati xavfsizligi, ommaviy toʻplanish joylarida tartib-intizomni saqlash masalalari muhokama qilindi. Mazkur davrda fuqarolar uchun xavfsiz va osoyishta muhit yaratish maqsadida ichki ishlar organlari tomonidan amalga oshirilishi lozim boʻlgan chora-tadbirlar belgilab berildi.
Mazkur yigʻilishda belgilangan vazifalarning oʻz vaqtida va sifatli ijrosini taʼminlash, ijro intizomini kuchaytirish, har bir rahbar va xodimning shaxsiy javobgarligini oshirish ustuvor vazifa sifatida belgilanib, ichki ishlar organlari faoliyati samaradorligini yanada oshirish zarurligi taʼkidlandi.