Gʻijduvonda profilaktika inspektorlari faoliyati tahlil qilindi: Xizmatga sadoqat va masʼuliyat — asosiy mezon
2026-02-10 15:35:00 / Yangiliklar
Buxoro viloyati Ichki ishlar boshqarmasi boshligʻi hamda Gʻijduvon tumani hokimi ishtirokida tuman ichki ishlar organlari profilaktika inspektorlari bilan kengaytirilgan xizmat uchrashuvi boʻlib oʻtdi. Tadbirda hududlarda huquqbuzarliklarning oldini olish, jinoyatchilikka qarshi kurashish samaradorligini oshirish hamda xodimlar oʻrtasida xizmat intizomini mustahkamlash masalalari tanqidiy ruhda muhokama qilindi.
Muloqot davomida tumandagi kriminogen vaziyat atroflicha tahlil etilib, oʻz xizmat vazifasiga masʼuliyatsizlik bilan yondashgan, mahalladagi vaziyatni toʻliq nazoratga olmagan bir qator xodimlar faoliyati keskin tanqid ostiga olindi. Yigʻilishda 2026-yil yakuniga qadar tumandagi barcha “qizil” toifadagi mahallalarni “yashil” hududga oʻtkazish boʻyicha aniq vazifalar belgilab berildi.
Shuningdek, tadbirda xodimlarni ijtimoiy qoʻllab-quvvatlash va ularning ish samaradorligini oshirish maqsadida yangi motivatsiya tizimi joriy etilishi eʼlon qilindi. Mazkur tizimga koʻra, har chorak yakunida oʻz xizmat vazifasini namunali bajargan 15 nafar eng ilgʻor profilaktika inspektori tuman hokimligi tomonidan moddiy va maʼnaviy ragʻbatlantiriladi. Ish koʻrsatkichlari past boʻlgan 3 nafar xodimga nisbatan boshqarma boshligʻi tomonidan intizomiy jazo choralari qoʻllaniladi.
Yil yakunida eng yuqori natija koʻrsatgan, oʻz hududida jinoyatchilikni jilovlay olgan 10 nafar xodim oila aʼzolari bilan birgalikda xorijiy davlatlarga sayohatga yuboriladi. Faoliyati davomida tizimli kamchiliklarga yoʻl qoʻygan va xizmatga noloyiq deb topilgan 5 nafar xodim egallab turgan lavozimidan ozod etiladi.
Uchrashuv yakunida profilaktika inspektorlarining yashash va xizmat sharoitlari, ularni qiynayotgan muammolar hamda takliflari tinglanib, masʼullarga tegishli koʻrsatmalar berildi. Mazkur tizim sohaga adolat va shaffoflikni olib kirish bilan birga, har bir xodimning oʻz ustida ishlashi va el-yurt tinchligi yoʻlidagi masʼuliyatini yanada oshirishga xizmat qilishi taʼkidlandi.
Buxoro viloyati IIB Axborot xizmati