Qashqadaryo viloyatida jamoat xavfsizligini taʼminlash, huquqbuzarliklarning oldini olish va aholi uchun xavfsiz muhitni yaratish maqsadida viloyat IIB rahbariyati tomonidan Qarshi shahri hududi boʻylab maxsus nazorat tadbirlari oʻtkazildi
2026-02-10 14:55:00 / Yangiliklar
Davlatimiz rahbarining joriy yil 27-yanvar kunidagi videoselektor yigʻilishida berilgan topshiriqlar ijrosini taʼminlash maqsadida tashkil qilingan tadbir davomida shahar hududida joylashgan savdo shoxobchalari, yirik bozorlar hamda aholi toʻplanadigan gavjum joylarda kirish-chiqish yoʻlaklariga oʻrnatilgan kuzatuv kameralarining ishlash holati, ularning qamrov darajasi va texnik talablarga muvofiqligi oʻrganib chiqildi.
Shuningdek, jamoat tartibini saqlash va profilaktik chora-tadbirlar samaradorligini oshirish maqsadida masʼullar “Qarliqxona” mahallasida joylashgan dehqon bozorida ham boʻlishdi. Maʼlumotlarga koʻra, mazkur bozorda kuniga 20 mingga yaqin odam tashrif buyuradi. Demakki, aholi xavfsizligini taʼminlash, xaridorlar uchun qulay sharoitlar yaratish dolzarb masala. Oʻrganish davomida bozordagi kuzatuv kameralarining holati batafsil tekshirildi. Avtoturargohlarni tartibga solish boʻyicha topshiriqlar berildi. Bozor ichida joylashgan savdo rastalari, shoxobchalarida tartib va xavfsizlikni taʼminlash choralari boʻyicha vazifalar yuklatildi. Shuningdek, “Tabassum” mahallasida ham oʻrganish ishlari olib borildi. Mahallada profilaktika inspektorlari faoliyati, mahalla faollari bilan hamkorlik, aholi bilan olib borilayotgan tushuntirish ishlari, shuningdek, mahalla hududida xavfsizlikni taʼminlashga qaratilgan infratuzilma holati koʻzdan kechirildi. Aholi yashash punkti hududiga kiruvchi “Koʻkcha nur” dehqon va oziq-ovqat bozorida xavfsizlikni taʼminlash boʻyicha qilingan ishlar, sunʼiy narx-navo oshishining oldini olish boʻyicha amalga oshirilayotgan ishlar holati oʻrganildi.
Nazorat tadbiri yakunida aniqlangan kamchiliklarni bartaraf etish, videokuzatuv tizimlarini yanada takomillashtirish, profilaktik ishlarni kuchaytirish hamda jamoat xavfsizligini taʼminlash borasida masʼullarga aniq topshiriqlar berildi. Shu orqali shaharda xavfsiz muhitni mustahkamlash, fuqarolarning tinch va osoyishta hayot kechirishini taʼminlash asosiy maqsad qilib belgilandi.
Qashqadaryo viloyati IIB Axborot xizmati