Namangan shahar hokimligida bozorlar faoliyatini tartibga solish, yashirin iqtisodiyotni qisqartirish va xavfsizlikni taʼminlash chora-tadbirlari masalalariga bagʻishlangan yigʻilish boʻlib oʻtdi
2026-02-10 10:35:00 / Yangiliklar
Viloyat hokimi Shavkatjon Abdurazzaqov rahbarligida oʻtkazilgan mazkur yigʻilishda huquqni muhofaza qiluvchi organlar rahbarlari, masʼul xodimlar hamda sohaga daxldor tashkilotlar vakillari ishtirok etdi.
Unda hududlarda tadbirkorlikni qoʻllab-quvvatlash, iqtisodiyotni barqaror rivojlantirish va aholi daromadlarini oshirishga qaratilgan islohotlar ijrosi, xususan, bozorlar faoliyatini belgilangan meʼyor va talablar asosida tashkil etish masalalari atroflicha muhokama qilindi.
Tahlillar davomida ayrim bozorlarda sanitariya-gigiyena va yongʻin xavfsizligi talablariga toʻliq rioya etilmayotgani, narx-navoni nazorat qilishdagi kamchiliklar hamda yashirin iqtisodiyot holatlarining mavjudligi tanqidiy koʻrib chiqildi.
Yigʻilishda Namangan viloyati IIB boshligʻi tomonidan sohada amalga oshirilayotgan ishlar va ustuvor vazifalar, shuningdek, jamoat xavfsizligini taʼminlash yuzasidan maʼlumot berildi. Shuningdek, Namangan shahar, Davlatobod va Yangi Namangan tumanlaridagi bozorlarda soliq bazasini kengaytirish, faoliyatni raqamlashtirish, shaffoflikni taʼminlash hamda mavjud kamchiliklarni bartaraf etish boʻyicha masʼul rahbarlarning hisobotlari tinglandi.
Muhokama yakunida aniqlangan kamchiliklarni bartaraf etish, bozorlarda shaffof va sogʻlom raqobat muhitini shakllantirish hamda nazorat tadbirlarini kuchaytirish yuzasidan aniq topshiriqlar berildi.
Namangan viloyati IIB Axborot xizmati