Probatsiya xizmati. Sen toʻgʻri yoʻlga qayta olasan
2026-02-09 23:00:00 / Yangiliklar
Namangan shahar IIB JXX Probatsiya boʻlinmasi tomonidan olib borilayotgan tadbirlar jinoyat sodir etgan shaxslar uchun yana bir imkoniyat yaratishga va ularni ijobiy xulq-atvorga yoʻnaltirishga xizmat qilmoqda.
Hozirgi kunda hisobimizda jami 1116 nafar nazorat ostidagi shaxs mavjud, — deydi boʻlinma boshligʻi, kapitan Dostonbek Abduqahhorov. — Ularning 1 063 nafari erkak, 53 nafari ayol, 29 nafari voyaga yetmagan, 323 nafari yoshlardir.
1116 nafar... Bu katta raqam. Mazkur raqam ortida adashgan taqdirlar, oʻylamay bosilgan qadamlar, soʻnmagan orzular bor. Ularning har biri oʻz xatosidan xulosa chiqarib, ikkinchi imkoniyatdan foydalanib, jamiyat oldida oʻz oʻrnini topishi kerak. “Sen toʻgʻri yoʻlga qayta olasan, biz senga ishonamiz” degim keladi.
Tuzalish yoʻliga oʻtgan shaxslar bilan manzilli ish olib borish ularda qonunga itoatkorlik va ijobiy xulq-atvorni shakllantirishda muhim rol oʻynaydi.
Buning uchun nazorat ostidagi shaxslar 3 ta asosiy toifaga ajratilgan: tuzalish yoʻliga oʻtganlar, jinoyat sodir etishga moyil shaxslar va jinoyat sodir etish xavfi yuqori boʻlganlar. Bunda har bir shaxsga individual yondashish va profilaktik ishlarni olib borish orqali muvaffaqiyatga erishish mumkin.
Yaqinda 2-sonli texnikumda oʻtkazilgan sayyor sud bu boradagi muhim tadbirlardan biri boʻldi, — deydi kapitan Dostonbek . — Unda sud tomonidan qoʻyilgan taqiq va cheklovlarga toʻliq amal qilgan 20 nafar shaxs muddatidan ilgari shartli ravishda ozod qilindi.
Bu, oʻz navbatida, insonparvarlik tamoyillari asosida amalga oshirilayotgan islohotlar samarasini koʻrsatadi.
©️ “Postda” gazetasi, Jahongir Toʻxtasinov, Namangan viloyati.