Buxoro tumanida “Chilonzor tajribasi”: “Yangiturmush” mahallasi toʻliq raqamlashtirilgan namunali hududga aylanadi
2026-02-09 09:00:00 / Yangiliklar
Buxoro viloyati Ichki ishlar boshqarmasi boshligʻi Buxoro tumanidagi “Yangiturmush” mahallasida boʻlib, hududda jamoat xavfsizligini taʼminlash va “Xavfsiz mahalla” konsepsiyasini joriy etish boʻyicha amalga oshirilayotgan ishlar bilan yaqindan tanishdi.
Oʻrganishlar davomida poytaxtda ijobiy samara bergan “Chilonzor tajribasi”ni mazkur mahallada ham tatbiq etish boʻyicha aniq vazifalar belgilab olindi. Boshqarma boshligʻi “yettilikning” mahalla hududini “qadamma-qadam” yurib oʻrganish orqali mavjud muammolarni joyida hal qilinishiga alohida eʼtibor qaratdi.
Tashrif davomida masʼullar oldiga, “Mahalla yettiligi” va profilaktika inspektorining faoliyatini pala-partishlikdan chiqarib, kunlik ishlarini rejalashtirish va shu asosda hisobdorlik tizimini yoʻlga qoʻyish, hududning oʻziga xos xususiyatidan kelib chiqqan holda jinoyatchilikni jilovlash boʻyicha manzilli “Yoʻl xarita”larini ishlab chiqish, zamonaviy texnologiyalarni keng joriy etish boʻyicha alohida yoʻl xaritasi tuzilib, joriy yil yakuniga qadar “Yangiturmush” mahallasini toʻliq raqamlashtirish (videokuzatuv, Face ID va boshqa intellektual tizimlar bilan qamrab olish) boʻyicha qatʼiy topshiriq berildi.
Mazkur chora-tadbirlar “Yangiturmush” mahallasini jinoyatdan holi, aholi uchun eng xavfsiz va tinch hududga aylantirishga xizmat qiladi.
Buxoro viloyati IIB Axborot xizmati