Ochiq muloqot formati: Buxoroda 40 ga yaqin taqdir va muammolar “shaxsiy nazorat”ga olindi
2026-02-09 09:00:00 / Yangiliklar
Xalq bilan muloqot qilish, insonlarning dardu tashvishlarini tinglash va ularni qiynayotgan muammolarga qonuniy yechim topish — ichki ishlar organlari faoliyatining ustuvor yoʻnalishlaridan biridir.
Ochiq va samimiy ruhda oʻtgan Buxoro viloyati IIB boshligʻining navbatdagi shaxsiy qabulida viloyatning turli hududlaridan kelgan 40 ga yaqin fuqaroning murojaatlari birma-bir koʻrib chiqildi.
Muloqot davomida kelib tushgan murojaatlarning aksariyati surishtiruv va dastlabki tergov harakatlaridan norozilik, jinoyat ishlari yuzasidan qabul qilingan qarorlarni qayta koʻrib chiqish, yoʻl harakati xavfsizligini taʼminlash bilan bogʻliq masalalarni qamrab oldi.
Shuningdek, soʻnggi vaqtlarda dolzarb boʻlib turgan firibgarlik jinoyati qurboni boʻlgan fuqarolar tomonidan yetkazilgan moddiy zararni undirishda amaliy yordam soʻrab qilingan murojaatlar hamda ichki ishlar organlariga xizmatga kirish va tizimga qayta tiklash masalalari ham rahbariyat eʼtiboridan chetda qolmadi.
Boshqarma boshligʻi har bir fuqaroning vajlarini diqqat bilan tinglab, muammolarni joyida hal etish choralarini koʻrdi. Vaqt va qoʻshimcha oʻrganish talab etiladigan murojaatlar boʻyicha sohaviy xizmat rahbarlariga aniq topshiriqlar berilib, ijrosi alohida nazoratga olindi.
Huquqiy tushuntirish berish orqali hal etilishi mumkin boʻlgan masalalar yuzasidan fuqarolarga zarur maslahatlar va yoʻl-yoʻriqlar koʻrsatildi.
Buxoro viloyati IIB Axborot xizmati