Peshkuda jamoat xavfsizligi va maʼnaviy muhitni mustahkamlashga qaratilgan kompleks tadbirlar
2026-02-08 12:05:00 / Yangiliklar
Peshku tumanida Buxoro viloyati Ichki ishlar boshqarmasi boshligʻi hamda tuman hokimi ishtirokida profilaktika inspektorlari, yoshlar va mahalla faollari bilan qator uchrashuvlar oʻtkazilib, jamoat xavfsizligi, ijtimoiy-maʼnaviy muhit va aholi muammolarini hal etish masalalari kompleks tarzda muhokama qilindi. Uchrashuvlar avvalida soha faoliyatidagi kamchiliklar, xizmat intizomi, hududdagi kriminogen vaziyat ochiq va tanqidiy tahlil qilinib, mavjud muammolarni bartaraf etish yuzasidan aniq vazifalar belgilandi.
Shu bilan birga, muloqotlar davomida rasmiyatchilikdan xoli, samimiy muhit yaratildi. Rahbarlar profilaktika inspektorlari va yoshlarni tinglab, ularning ijtimoiy, oilaviy hamda shaxsiy masalalariga alohida eʼtibor qaratdilar. Xodimlar va yoshlar tomonidan bildirilgan ishga joylashish, taʼlim, tadbirkorlik, sogʻliqni saqlash va boshqa hayotiy masalalar yuzasidan murojaatlar shaxsan nazoratga olinib, ularni ijobiy hal etish boʻyicha tegishli masʼullarga topshiriqlar berildi. Faolligi va namunaviy xizmati bilan ajralib turgan xodimlar hamda yoshlar ragʻbatlantirildi.
Tadbirlar doirasida “Chilonzor tajribasi” asosida mahallalarda profilaktika ishlarini tashkil etish, huquqbuzarliklarning oldini olishda tub sabablarni barvaqt aniqlash, “xonadonbay” ishlash tizimini amalda samarali yoʻlga qoʻyish, raqamli texnologiyalar va videokuzatuv vositalaridan keng foydalanish masalalari ham koʻrib chiqildi. Mahallalarni obodonlashtirish, “yashil” toifaga oʻtkazish va aholi roziligini taʼminlash ustuvor vazifa sifatida belgilandi.
Ushbu uchrashuvlar inson qadrini ulugʻlash, xodimlar va yoshlarning ruhiy xotirjamligini taʼminlash hamda jinoyatchilikka qarshi kurashishda hamjihatlik va masʼuliyatni yanada kuchaytirishga xizmat qiladigan amaliy tadbirlar sifatida ahamiyat kasb etdi.
Buxoro viloyati IIB Axborot xizmati