Sirdaryo viloyati Guliston tumanida jinoyatchilik va huquqbuzarliklarning oldini olish boʻyicha kengaytirilgan yigʻilish oʻtkazildi
2026-02-08 10:45:00 / Yangiliklar
Sirdaryo viloyati prokurori hamda viloyat Ichki ishlar boshqarmasi boshligʻi huzurida Guliston tumanida jinoyatchilik ahvoli, huquqbuzarliklarning oldini olish hamda kriminogen vaziyat barqarorligini taʼminlash borasida amalga oshirilayotgan ishlar yuzasidan kengaytirilgan yigʻilish boʻlib oʻtdi.
Mazkur yigʻilishda viloyat va tuman hokimligi masʼullari, huquqni muhofaza qiluvchi organlar xodimlari, mahalla yettiliklari, uy boshi va koʻchaboshilar, shuningdek, keksa nuroniylar va keng jamoatchilik vakillari ishtirok etdi.
Tanqidiy-tahliliy ruhda oʻtgan muloqot davomida Guliston tumanida mavjud boʻlgan 24 ta mahalla fuqarolar yigʻinlarida sodir etilgan jinoyat va huquqbuzarliklar holati, ularning kelib chiqishiga sabab boʻlayotgan omillar, shuningdek, ushbu holatlarning oldini olishga masʼul boʻlgan rahbarlarning faoliyati tanqidiy ruhda koʻrib chiqildi. Jumladan, har bir mahalla kesimida yoshlar, xotin-qizlar va voyaga yetmagan shaxslar tomonidan sodir etilgan huquqbuzarliklar muhokama qilinib, mavjud kamchiliklar tanqidiy baholandi.
Yigʻilishda soʻzga chiqqan mutasaddilar aniqlangan muammolarni oʻz vaqtida bartaraf etish, “Xavfsiz mahalla” tamoyili asosida hududlarda kuzatuv kameralarini oʻrnatish, huquqbuzarliklarning barvaqt oldini olishga qaratilgan profilaktik tadbirlarni kuchaytirish zarurligini taʼkidladi. Shuningdek, aholi bilan ijtimoiy profilaktika yoʻnalishida muntazam va tizimli ishlarni tashkil etish, fuqarolarning huquqiy ongi va madaniyatini oshirish muhimligi qayd etildi.
Shuningdek, jinoyat va huquqbuzarliklarni oldini olishga barcha birdek masʼul ekanligi, shuning uchun ham idoralararo hamkorlikni namunali yoʻlga qoʻyish,uy boshi va koʻchaboshilar bilan doimiy muloqot qilish, ijtimoiy himoyaga muhtoj aholi vakillarini mavjud muammolarini ijobiy hal etish, bandligini taʼminlash choralarini koʻrish yuzasidan masʼullarga aniq vazifalar belgilab berildi.
Yakunda yigʻilishda ishtirok etgan keksa nuroniylar tomonidan ham jinoyat va huquqbuzarliklarning oldini olish, yoshlarni sogʻlom muhitda tarbiyalash, mahallalarda osoyishtalikni taʼminlash borasida qator taklif va mulohazalar bildirildi. Bildirilgan fikrlar esa mutasaddilar tomonidan inobatga olinishi qayd etildi.
Sirdaryo viloyati IIB Axborot xizmati