Prezident qarorlari ijrosi: Navoiyda mahallalarda xavfsiz muhitni taʼminlash boʻyicha yangi bosqich
2026-02-08 00:30:00 / Yangiliklar
Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ–1 va PQ–2-sonli qarorlari ijrosini taʼminlash, shuningdek mahallalarda xavfsiz muhitni yaratish maqsadida Navoiy shahrida qator manzilli va amaliy tadbirlar amalga oshirilmoqda.
Jumladan, Navoiy shahridagi “Kimyogar” mahallasida keng qamrovli oʻrganishlar tashkil etildi. Ushbu oʻrganishlarda Davlat xavfsizlik xizmati viloyat boshqarmasi boshligʻi, viloyat prokurori, Ichki ishlar boshqarmasi boshligʻi, viloyat hokimining oʻrinbosari hamda boshqa mutasaddi tashkilot rahbarlari ishtirok etdi.
Oʻrganishlar davomida mahalla hududida jinoyatchilik va huquqbuzarliklarning oldini olish, aholi xavfsizligini taʼminlash, ijtimoiy muammolarni barvaqt aniqlash va ularni joyida hal etish masalalarida mahalla “yettiligi” vakillarining oʻrni va masʼuliyatiga alohida eʼtibor qaratildi. Har bir yoʻnalish boʻyicha masʼullar oʻz vakolatlaridan samarali foydalanishi, aholi bilan muntazam muloqot olib borishi zarurligi taʼkidlandi.
Shuningdek, Prezidentning “Toshkent shahrida xavfsiz muhitni shakllantirish hamda jamoat xavfsizligini samarali taʼminlash boʻyicha namunaviy amaliyotni yaratish chora-tadbirlari”ga bagʻishlangan videoselektor yigʻilishida belgilangan vazifalar asosida “poytaxt namunasi”ni hududlarda joriy etish masalalari muhokama qilindi. Xususan, kriminogen vaziyatni barqarorlashtirish boʻyicha Chilonzor tumani tajribasini Navoiy viloyatida tatbiq etish yuzasidan amaliy ishlar boshlab yuborildi.
Ayni paytda Navoiy shahrida 33 ta mahalla mavjud boʻlib, ularga 17 nafar rahbar va 33 nafar masʼul xodim nomma-nom biriktirilgan. Bundan tashqari, viloyat Mahallalar uyushmasi qoshida doimiy faoliyat yurituvchi tezkor shtab tashkil etildi.
Davlat xavfsizlik xizmati, viloyat hokimligi, viloyat prokuraturasi, Ichki ishlar boshqarmasi hamda boshqa masʼul idoralar rahbarlari ishtirokida mahallalar uyushmasida oʻtkazilgan yigʻilishda mahalla va jamoat joylarida kriminogen vaziyatga salbiy taʼsir koʻrsatayotgan omillar bilan manzilli ishlash tizimini joriy etish masalalari muhokama qilindi.
Muhokamalarda oilaviy-turmush munosabatlariga oid jinoyat va huquqbuzarliklar, xotin-qizlar va yoshlarning ijtimoiy-maishiy muammolari, ijtimoiy profilaktika, kiber, uyushgan va giyohvandlik bilan bogʻliq jinoyatlarga qarshi kurashish, shuningdek fuqarolar murojaatlariga tezkor munosabat bildirish mexanizmlariga alohida eʼtibor qaratildi.
Uchrashuv yakunida Prezident qarorlaridan kelib chiqib belgilangan vazifalarni tizimli, muvofiqlashtirilgan va natijadorlikka yoʻnaltirilgan holda amalga oshirish, bajarilgan ishlar yuzasidan muntazam hisobot berib borish hamda mahallalarda tinchlik va osoyishtalikni taʼminlash ustuvor vazifa etib belgilab olindi. Mazkur yoʻnalishdagi oʻrganishlar viloyatning boshqa hududlarida ham davom ettiriladi.
Navoiy viloyati IIB Axborot xizmati