IIV Akademiyasi boshligʻi Chilonzor tumani mahallalarida xavfsiz muhit yaratish va jamoat xavfsizligini taʼminlash boʻyicha amalga oshirilayotgan ishlar bilan tanishdi
2026-02-07 18:10:00 / Yangiliklar
Prezidentimiz raisligida boʻlib oʻtgan videoselektor yigʻilishida xavfsiz muhit yaratish boʻyicha “poytaxt namunasi”ni amaliyotga joriy etish belgilangan edi.
IIV Akademiyasi boshligʻi Rustam Xatamov poytaxtimizning Chilonzor tumanidagi “Beshqoʻrgʻon” mahallasida boʻlib, jamoat xavfsizligini taʼminlash, huquqbuzarliklarning barvaqt oldini olish, aholi uchun xavfsiz muhit yaratish borasida amalga oshirilayotgan ishlar bilan tanishdi.
Aytish joizki, yangi tajriba mazkur mahallaga ham keng tatbiq qilinmoqda. Ana shu maqsadda hududlarga 80 dan ortiq turli xildagi zamonaviy kamera, 10 ta tashvish tugmasi hamda tungi chiroqlar oʻrnatildi. Huquqbuzarlik sodir etilishi mumkin boʻlgan joylarda qoʻshimcha patrullik guruhlari tashkil etilib, xavfsizlik choralari kuchaytirildi.
Ijtimoiy profilaktika doirasida jinoyat sodir etish yoki undan jabrlanish ehtimoli yuqori shaxslar aniqlanib, “mahalla yettiligi” tizimiga yoʻnaltirildi. Sayyor qabullar jarayonida fuqarolardan kelib tushgan yuzdan ortiq muammoli masalalar ijobiy hal qilindi. Kriminogen vaziyatga salbiy taʼsir koʻrsatayotgan omillarni bartaraf etish yuzasidan korxona, tashkilot va muassasalarga taqdimnomalar kiritildi.
Shu kuni Akademiya boshligʻi masʼullar va “mahalla yettiligi” vakillari bilan yuzma-yuz muloqot qildi. Aholi muammolarini oʻrganish, ijtimoiy profilaktikani samarali tashkil etish, oila-turmush doirasidagi huquqbuzarliklarning barvaqt oldini olish, jinoyatchilik omillarini kamaytirish borasida koʻrilayotgan chora-tadbirlarni muhokama qildi.
Mahalla hududidagi “Chilonzor” buyum bozoriga qarashli avtoturargohni koʻzdan kechirib, viloyatlararo qatnovchi haydovchilar bilan suhbatlashdi. Maskanda aholi uchun yaratilgan sharoitlar bilan tanishib, ularning muammo va takliflarini tingladi. Shundan soʻng bozor hududida tashkil qilingan 5-son ichki ishlar boʻlimi faoliyati oʻrganildi.
Bundan tashqari, ishchi guruh vakillari “Katta Chilonzor-3” mahallasida ham boʻldi. “Mahalla yettiligi” xodimlari bilan uchrashuvda Prezidentimiz raisligida oʻtgan videoselektor yigʻilishida belgilab berilgan dolzarb vazifalar yetkazildi.
Akademiya boshligʻi “yettilik” vakillarining axborotini eshitdi. Mahalla profilaktikasini samarali tashkil qilish, mavjud kuch-vositalardan oqilona foydalanish, aholi murojaatlariga tezkorlik bilan munosabat bildirish, kriminogen vaziyatni kunlik tahlil qilib borish yuzasidan ularga tavsiyalar berdi.
Oʻrganishlar yakunida taʼlim muassasasidan biriktirilgan masʼullarga hududlarni oʻrganish chogʻida aniqlangan muammolarning yechimlariga qaratilgan taklif va tavsiyalar ishlab chiqish, kriminogen omillarni ilmiy yondashuvlar asosida tahlil qilish, ilgʻor tajribalarni yaratish borasida topshiriqlar berildi.
Qayd etish joizki, poytaxtimizda xavfsiz muhit yaratish va kriminogen vaziyatni barqarorlashtirish boʻyicha keng qamrovli ishlar amalga oshirilmoqda. Namunaviy amaliyotni yoʻlga qoʻyish maqsadida Chilonzor tumaniga akademiya professor-oʻqituvchilari, magistratura tinglovchilari hamda kunduzgi taʼlimning 3-kursida tahsil olayotgan barcha kursantlar jalb qilingan. Bu ham natijadorlikni oshirishga xizmat qilmoqda.
IIV Akademiyasi Axborot xizmati