Yakkasaroy tumanida jamoat xavfsizligini taʼminlash boʻyicha amalga oshirilayotgan ishlar oʻrganildi
2026-02-07 18:40:00 / Yangiliklar
Yakkasaroy tumanida jamoat xavfsizligini taʼminlash borasida amalga oshirilayotgan ishlar joyiga chiqib oʻrganildi. Unda Oʻzbekiston Respublikasi Oliy sudi raisi Baxtiyor Islomov, Oʻzbekiston Respublikasi Kriminologiya tadqiqot instituti boshligʻi Baxtiyor Berdialiyev, tuman hokimi Nilufar Allabergenova, tuman sudi raisi Alisher Jalilov, tuman prokurori Bekzod Shamshyiev, tuman IIO FMB boshligʻi Alisher Murodov hamda masʼul rahbarlar ishtirok etdi.
Ishchi guruh tumandagi “NEXT MALL” savdo majmuasida boʻlib, aholi va mehmonlar uchun yaratilgan xavfsiz muhit, jamoat tartibini saqlash choralari hamda zamonaviy nazorat tizimlari faoliyati bilan tanishdi.
Shuningdek, masʼullar tomonidan videokuzatuv kameralari, navbatchilik boʻlimi faoliyati va profilaktika mexanizmlarining amaliy samaradorligi alohida oʻrganildi.
Oʻrganish yakunida fuqarolar osoyishtaligini taʼminlash, huquqbuzarlik va jinoyatlarning barvaqt oldini olish, profilaktika ishlarini kuchaytirish hamda zamonaviy kriminologik yondashuvlarni amaliyotga keng joriy etish yuzasidan aniq va manzilli yondashuvlar berildi.
Taʼkidlanganidek, zamonaviy infratuzilma, ilmiy asoslangan kriminologik yondashuv va kuchli profilaktika tizimi — tinch va xavfsiz hayotning muhim kafolatidir.