Navoiyda mahallalarda xavfsiz muhit yaratish masalalari tanqidiy-tahliliy ruhda muhokama qilindi
2026-02-07 15:35:00 / Yangiliklar
Navoiyda viloyat hokimi rahbarligida mahallalarda xavfsiz muhitni yaratish va huquqbuzarliklarning barvaqt oldini olishning samarali tizimini shakllantirishga qaratilgan tanqidiy-tahliliy yigʻilish boʻlib oʻtdi.
Unda viloyat hokimligi, huquqni muhofaza qilish organlari vakillari, xotin-qizlar va yoshlar masalalari boʻyicha masʼullar va mahallalarning yettilik yetakchilari ishtirok etishdi. Viloyat hokimi raisligida boʻlib oʻtgan yigʻilishda kriminogen vaziyat Karmana tumani mahallalari misolida koʻrib chiqildi. Viloyat prokurori, Ichki ishlar boshqarmasi boshligʻi hamda Karmana tumani hokimi va tumandagi “Kumushkon” mahallasi yettiligi soʻzga chiqib, har biri oʻz sohasi kesimida bajarilishi lozim boʻlgan chora-tadbirlar xususida soʻz yuritdi.
Viloyatdagi “qizil“ toifadagi mahallalarni “yashil“ toifaga olib chiqish, oilalarni kambagʻallikdan toʻlaligicha chiqarish, har bir fuqaroning bandligini taʼminlash, jinoyatchilikni bartaraf etish masalalari birgalikda yechilsagina, ijobiy va haqiqiy natijaga erishilishi taʼkidlanib, hamkorlikda amalga oshiriladigan rejalar belgilab olindi.
Shuningdek, yil davomida ijobiy natijalar koʻrsatgan mahallalar yettiligining faoliyati eʼtirof etilib, bir guruh profilaktika inspektorlari viloyat hokimi tomonidan zamonaviy kompyuter jamlanmasi hamda tashakkurnoma bilan taqdirlandi.
Navoiy viloyati IIB Axborot xizmati