Qashqadaryo viloyati Qarshi shahrida jamoat xavfsizligini taʼminlash va jinoyatchilik profilaktikasida “Chilonzor tajribasi” joriy etilmoqda
2026-02-06 09:00:00 / Yangiliklar
Qarshi shahrida PQ-1 va PQ-2 qarorlari ijrosi doirasida “Chilonzor tajribasi” asosida jamoat xavfsizligini taʼminlash, jinoyatchilik profilaktikasini kuchaytirish, bozorlar faoliyatini raqamlashtirish hamda yashirin iqtisodiyotga qarshi kurashish boʻyicha tizimli ishlar amalga oshirilmoqda.
Mazkur yoʻnalishda viloyat ichki ishlar boshqarmasi boshligʻi tomonidan hamkor tashkilotlar masʼullari ishtirokida mahallalarda xavfsiz muhitni shakllantirish va jamoat xavfsizligini taʼminlash masalalariga bagʻishlangan kengaytirilgan xizmat oldi yoʻriqnomasi oʻtkazildi.
Yoʻriqnoma davomida patrul-post, yoʻl-patrul, qoʻriqlash va profilaktika xizmatlari tomonidan tunu kun, uch smenali xizmatni tashkil etishda eʼtibor qaratilishi lozim boʻlgan asosiy yoʻnalishlar va ustuvor vazifalar atroflicha tushuntirib berildi.
Shuningdek, profilaktik ishlar faqat umumiy tarzda emas, balki har bir xonadon va oila kesimida olib borilishi, taʼlim muassasalari, mahalla va huquqni muhofaza qiluvchi organlar oʻrtasidagi hamkorlikni yangi, samarali formatga oʻtkazish, markaziy koʻchalar va jamoat joylarida tartib-intizomni taʼminlash hamda jinoyat sodir etilishi ehtimoli yuqori boʻlgan hududlarda barvaqt oldini olish maqsadida raqamlashtirish jarayonlarini jadallashtirish vazifalari belgilab berildi.
Bu borada har bir mahalla kesimida masʼullar nomma-nom biriktirilib, belgilangan chora-tadbirlarni oʻz vaqtida va sifatli amalga oshirish yuzasidan aniq topshiriqlar yuklatildi.
Alohida eʼtibor huquqbuzarliklar koʻp kuzatilayotgan va xavf darajasi yuqori boʻlgan, shartli ravishda “qizil” toifaga kiritilgan mahallalarga qaratildi. Ushbu hududlarda kompleks profilaktik tadbirlarni kuchaytirish, ayniqsa, oila-turmush munosabatlari, yoshlar hamda muqaddam sudlangan shaxslar tomonidan qayta jinoyat sodir etilishining oldini olishga qaratilgan ishlar izchil tashkil etilmoqda.
Shuningdek, hududlardagi markaziy bozorlar va savdo komplekslari faoliyatini tizimli yoʻlga qoʻyish, savdo jarayonlarini xavfsiz va tartibli tashkil etish, qisqa muddatlarda raqamlashtirish jarayonlarini yakunlash hamda yashirin iqtisodiyotni qisqartirish boʻyicha tegishli koʻrsatmalar berildi.
Mazkur chora-tadbirlar mahallalarda xavfsiz muhitni mustahkamlash, aholi tinchligini taʼminlash hamda jinoyatchilikning oldini olish samaradorligini oshirishga xizmat qilmoqda.
Qashqadaryo viloyati IIB Axborot xizmati