Toshkent shahar Yakkasaroy tumanida Kriminologiya tadqiqot instituti ishtirokida xotin-qizlarni qoʻllab-quvvatlashga qaratilgan sayyor qabul oʻtkazildi
2026-02-06 09:00:00 / Yangiliklar
Yakkasaroy tumanida Oʻzbekiston Respublikasi Prezidentining 2026-yil 5-yanvardagi PQ–1-son qarori ijrosini taʼminlash doirasida sayyor qabul tashkil etildi. Mazkur uchrashuv ochiq muloqot, amaliy yordam va real yechimlar maydoniga aylandi.
Sayyor qabul probatsiya roʻyxatida turuvchi hamda jazoni oʻtab qaytgan xotin-qizlarni qoʻllab-quvvatlash, ularning bandligini taʼminlash va jamiyatga qayta moslashuviga koʻmaklashish masalalariga bagʻishlandi.
Tadbirda Oʻzbekiston Respublikasi Oliy sudi raisi Baxtiyor Islomov, Kriminologiya tadqiqot instituti boshligʻi Baxtiyor Berdialiyev, tuman sudlari va hokimlik masʼullari, ichki ishlar organlari xodimlari hamda tegishli tashkilotlar rahbarlari ishtirok etdi.
Uchrashuv davomida har bir murojaat ortida turgan taqdir va muammolar alohida eʼtibor bilan tinglandi. Probatsiya hisobida turuvchi va jazoni oʻtab qaytgan xotin-qizlarning bandlik, kasb-hunar egallash, ijtimoiy qoʻllab-quvvatlashga doir murojaatlari joyida oʻrganilib, manzilli choralar belgilandi.
Ishga joylashtirish, kasbga yoʻnaltirish, tadbirkorlik faoliyatiga jalb etish hamda ijtimoiy yordam koʻrsatish yoʻnalishlarida masʼullarga aniq topshiriqlar berildi.
Mazkur sayyor qabul inson qadri, ijtimoiy adolat va mehr-oqibat tamoyillari ustuvorligini amalda namoyon etib, davlat organlari hamda jamoatchilik hamkorligining yana bir muhim namunasi boʻldi.
Oʻzbekiston Respublikasi Kriminologiya tadqiqot instituti