O‘zbеkiston Rеspublikаsi Ichki ishlаr vаzirligi

Jumladan, Samarqand viloyati ichki ishlar boshqarmasi boshligʻi tomonidan huquqni muhofaza qilish organlari rahbar va xodimlari, shuningdek, hamkor tashkilotlar masʼullari ishtirokida mahallalarda xavfsiz muhitni shakllantirish va jamoat xavfsizligini taʼminlash masalalariga bagʻishlangan kengaytirilgan xizmat oldi yoʻriqnomasi oʻtkazildi.

Yoʻriqnoma davomida patrul-post, yoʻl-patrul, qoʻriqlash va profilaktika xizmatlari tomonidan tun-u kun, uch smenali xizmatni tashkil etish jarayonida eʼtibor qaratilishi lozim boʻlgan asosiy yoʻnalishlar va ustuvor vazifalar atroflicha tushuntirib berildi.

Tadbir davomida Ichki ishlar vazirligining ishchi guruhi tomonidan mahallalarda amalga oshirilayotgan ishlar hamda koʻrilayotgan chora-tadbirlar bilan yaqindan tanishish maqsadida hududiy oʻrganishlar olib borildi.

Xususan, Samarqand shahrida kriminogen vaziyati nisbatan ogʻir boʻlgan Rasadxona mahallasida oʻrganishlar oʻtkazildi. Unda hududdagi jinoyatchilik holatiga bevosita taʼsir koʻrsatuvchi “Samarqand–Toshkent” va “Samarqand–Buxoro” yoʻnalishlarida joylashgan avtovokzallardagi kriminogen vaziyat atroflicha tahlil qilindi.

Ichki ishlar vaziri tomonidan mazkur obyektlarda jamoat xavfsizligini mustahkamlash, fuqarolar va yoʻlovchilarning osoyishtaligini taʼminlash maqsadida ogohlantiruvchi texnik vositalarni oʻrnatish, patrul-post xizmati uchun maxsus jihozlangan nazorat maskanlarini tashkil etish, shuningdek, aholini doimiy ravishda hushyorlikka chorlovchi targʻibot va tushuntirish ishlarini kuchaytirish boʻyicha aniq topshiriqlar berildi.

Samarqand shahar boʻyicha IIO FMB huzuridagi Qoʻriqlash boʻlimi faoliyati oʻrganilib, obyektlarni markazlashtirilgan qoʻriqlash pultiga ulash va ularni texnik qoʻriqlovga olish borasida amalga oshirilayotgan ishlar tanqidiy ruhda tahlil qilindi.

Shu bilan birga, aholining mol-mulkini ishonchli himoya qilish, qoʻriqlash xizmatlari faoliyatini yanada takomillashtirish hamda ushbu sohada raqamlashtirish jarayonlarini jadallashtirish boʻyicha aniq va ustuvor vazifalar belgilab berildi.

Samarqand shahrining Mustaqillik mahallasida ham oʻrganishlar oʻtkazilib, mahalla “yettiligi” tomonidan hududda jinoyat va huquqbuzarliklarning oldini olish borasida amalga oshirilayotgan ishlar sarhisob qilindi.

Mazkur hududda joylashgan 37-sonli umumtaʼlim maktabida xavfsizlik masalalari koʻzdan kechirilib, transport oqimi zichligini inobatga olgan holda oʻquvchilar xavfsizligini taʼminlash maqsadida maktab atrofidagi yoʻllarda sunʼiy notekisliklar (tezlikni cheklovchi vositalar) barpo etish, shuningdek, taʼlim muassasasida qoʻriqlash xizmati xodimlari faoliyatini tashkil etish boʻyicha topshiriqlar berildi.

Shuningdek, Samarqand viloyatining Pastdargʻom tumanida kriminogen vaziyati ogʻir hisoblangan “Amir Temur”, “Samarqand”, “Sazagan”, “Poʻlatchi” va “Sharof Rashidov” mahallalariga xizmat koʻrsatuvchi 133-sonli markaziy tayanch punkt faoliyati oʻrganilib, Davlat rahbarining joriy yilda qabul qilingan 1 va 2-sonli qarorlari ijrosini sifatli va oʻz vaqtida taʼminlash yuzasidan aniq topshiriqlar berildi.

Bundan tashqari, savdo va xizmat koʻrsatish majmualarida oʻtkazilgan oʻrganishlar jarayonida yongʻin xavfsizligi qoidalariga soʻzsiz va toʻliq rioya etish, mavjud kamchiliklarni oʻz vaqtida bartaraf etish hamda fuqarolar hayoti va sogʻligʻiga tahdid soluvchi har qanday koʻngilsiz holatlarning oldini olish maqsadida masʼul rahbarlarga aniq va qatʼiy topshiriqlar berildi. 

Ayni paytda mazkur oʻrganish ishlari viloyat hududida izchil davom etmoqda.