“Fidoyi ayol xodima” koʻrik-tanlovining Andijon viloyati bosqichi boʻlib oʻtdi
2026-02-04 09:00:00 / Yangiliklar
Andijon viloyati ichki ishlar organlarida xizmat olib borayotgan ayol xodimalar oʻrtasida “Fidoyi ayol xodima” koʻrik-tanlovining viloyat bosqichi tashkil etildi.
Mazkur koʻrik-tanlov ayol xodimalarning kasbiy bilim va malakalarini yanada oshirishni qoʻllab-quvvatlash, oʻz kasbining bilimdon va mohir vakillari oʻrtasida sogʻlom raqobat muhitini shakllantirish, shuningdek, ayol xodimalarning jangovar, jismoniy hamda kasbiy tayyorgarlik darajasini mustahkamlash, professional va intellektual salohiyatini yuksaltirish maqsadida oʻtkazildi.
Tanlov davomida ishtirokchi ayol xodimalar uch bosqichda belgilangan sinov shartlaridan oʻtdilar.
Xususan, 1000 metr masofaga yugurish, kompleks jismoniy mashqlar, “Makarov” toʻpponchasini toʻliqsiz qismlarga ajratish va qayta yigʻish, amaliy oʻq otish mashgʻulotlari hamda elektron test sinovlari orqali oʻz bilim va mahoratini namoyon etdilar.
Sinovlar natijasiga koʻra, barcha shartlarda eng yuqori koʻrsatkichlarni qayd etgan ayol xodima gʻolib deb topilib, koʻrik-tanlovning Respublika bosqichida ishtirok etish huquqini qoʻlga kiritdi.
Ushbu tanlov ichki ishlar organlarida xizmat qilayotgan ayol xodimalarning kasbiy faoliyatini qoʻllab-quvvatlash, ularning xizmatga boʻlgan masʼuliyatini oshirish hamda soha nufuzini yanada yuksaltirishga xizmat qilmoqda.
Andijon viloyati IIB Axborot xizmati