Qashqadaryo viloyatida kiberjinoyatchilikka qarshi kurashish va raqamli savodxonlikni oshirish boʻyicha hamkorlik memorandumlari imzolandi
2026-02-03 11:40:00 / Yangiliklar
Qashqadaryo viloyati Ichki ishlar boshqarmasi tomonidan axborot texnologiyalari sohasida sodir etilayotgan jinoyatlarning oldini olish, aholining raqamli savodxonligini oshirish hamda yoshlar oʻrtasida huquqbuzarliklarning profilaktikasini kuchaytirish maqsadida Janubiy-Gʻarbiy maxsus harbiy okrugi, Maktabgacha va maktab taʼlimi boshqarmasi hamda Qarshi davlat texnika universiteti bilan hamkorlik memorandumlari imzolandi.
Mazkur memorandumlar doirasida viloyat IIB xodimlari, harbiy xizmatchilar, Qarshi davlat texnika universitetining professor-oʻqituvchilari va talabalari, shuningdek, maktabgacha va maktab taʼlimi tizimida faoliyat yuritayotgan pedagog va mutaxassislar bilan hamkorlikda volontyorlar jalb etgan holda targʻibot-tashviqot ishlarini yanada jadallashtirish boʻyicha kelishib olindi.
Hamkorlik doirasida axborot texnologiyalaridan foydalanish madaniyatini yuksaltirish, kiberjinoyatchilikka qarshi kurashish, internet va ijtimoiy tarmoqlarda xavfsizlik qoidalariga rioya etish, shaxsiy maʼlumotlarni himoyalash hamda turli firibgarlik holatlarining oldini olishga qaratilgan uchrashuvlar, davra suhbatlari, seminar-treninglar va targʻibot tadbirlarini tizimli ravishda tashkil etish rejalashtirilgan.
Mazkur tadbirlar orqali keng jamoatchilik, ayniqsa yoshlar va taʼlim muassasalari xodimlari oʻrtasida huquqiy ong va madaniyatni oshirish, zamonaviy axborot tahdidlariga nisbatan hushyorlikni kuchaytirish koʻzda tutilgan.
Qashqadaryo viloyati IIB Axborot xizmati