“Temir intizom“ va yuksak motivatsiya: Buxoro viloyati Jondor tumanida eng yaxshi 5 nafar profilaktika inspektori oilasi bilan chet elga yuboriladi
2026-02-03 10:50:00 / Yangiliklar
27-yanvar kuni Davlatimiz rahbari tomonidan oʻtkazilgan videoselektor yigʻilishida ichki ishlar organlari, xususan, profilaktika inspektorlari faoliyatiga nisbatan mutlaqo yangicha yondashuv talab etilgan edi.
Ana shu “Temir intizom“ va “Yangi tizim“ talablaridan kelib chiqib, Buxoro viloyati Ichki ishlar boshqarmasi boshligʻi hamda Jondor tumani hokimi ishtirokida anʼanaviy maʼruzalardan xoli tarzda, profilaktika inspektorlari bilan ikki bosqichli uchrashuv tashkil etildi.
Yigʻilishning dastlabki qismi tanqidiy va tahliliy ruhda kechdi. Rahbarlar tomonidan Jondor tumanidagi kriminogen vaziyat ogʻir boʻlgan mahallalar kesimida jinoyatchilik salmogʻi chuqur tahlil qilindi.
Xususan, ayrim hududlarda profilaktika inspektorlarining oʻz xizmat vazifalariga sovuqqonlik bilan yondashayotganligi, “Mahalla yettiligi“ bilan hamkorlik yetarli darajada yoʻlga qoʻyilmaganligi hamda oilaviy-maishiy nizolarning oldini olishdagi sustkashliklar qattiq tanqid ostiga olindi. Viloyat IIB boshligʻi har bir jinoyat ortida inson taqdiri turganligini taʼkidlab, faoliyatida kamchilikka yoʻl qoʻygan masʼullarga nisbatan qatʼiy intizomiy choralar koʻrish va ish uslubini tubdan oʻzgartirish boʻyicha aniq topshiriqlar berdi.
Tadbirning ikkinchi qismida asosiy eʼtibor xodimlarni qoʻllab-quvvatlash va ularga motivatsiya berishga qaratildi. Jondor tumani hokimi profilaktika inspektorlari mehnatini qadrlash boʻyicha yangi tashabbuslarni eʼlon qildi. Xususan, oy va chorak yakunlari boʻyicha oʻz xizmat hududida jinoyatchilikni jilovlashda yuqori natijalarga erishgan profilaktika inspektorlari qimmatbaho sovgʻalar bilan muntazam taqdirlanib boriladi. Yil yakunidagi esa eng yaxshi natijaga erishgan 5 nafar profilaktika inspektorini oila aʼzolari bilan birgalikda chet elga sayohatga yuborish boʻyicha vaʼda berildi.
Shuningdek, ochiq muloqot davomida tuman hokimi va boshqarma boshligʻi inspektorlar bilan yuzma-yuz gaplashib, ularni qiynayotgan muammolarni tingladilar.
Inspektorlar tomonidan xizmat uyi va yashash sharoitini yaxshilash, moddiy-texnik bazani mustahkamlash hamda xizmat faoliyati davomida yuzaga kelayotgan byurokratik toʻsiqlar yuzasidan murojaat va takliflar bildirildi. Rahbarlar har bir murojaatni nazoratga olib, “Temir intizom“ talab qilingan joyda, xodimlar uchun barcha zarur sharoitlar ham yaratib berilishini taʼkidladilar.
Buxoro viloyati IIB Axborot xizmati