O‘zbеkiston Rеspublikаsi Ichki ishlаr vаzirligi

Andijon viloyati IIB EKM katta eksperti, katta leytenant Dilbarxon Umarova oʻzida chuqur bilim, tahlil qilish qobiliyati, sabr va masʼuliyat kabi sifatlarni mujassam etgan xodimlardan.

Lavhamiz qahramoni IIV Akademiyasida ustozlari — podpolkovniklar Sadoqatxon Nurimbetova, Furqat Sobirov hamda Anvarjon Husanovlardan saboq olib, kasbiy koʻnikmaga ega boʻldi. 2022-yilda Andijon viloyati IIB EKMda ilk xizmat faoliyatini boshlab, nazariya bilan amaliyot oʻrtasidagi farqni chuqur his qilgan holda, ularni muvaffaqiyatning qoʻsh qanotiga aylantira oldi.

Tabiiyki, oʻqish bilan xizmat orasida katta farq bor, — deydi u. — Akademiyada asosan nazariy bilim oldim, xizmatda esa oʻsha bilimlarni amalda qoʻllash talab etiladi. Bu borada podpolkovniklar — Kamoliddin Mamasoliyev, Omadjon Mamadaliyev hamda mayor Dostonbek Qosimjonovlar kasb sir-sinoatlarini oʻrgatishdi. Hozir ham biror ishni bajarishdan avval ularning maslahatini olaman, oʻgitlariga amal qilaman.

Ayni paytda katta leytenant Dilbarxon Umarova xatshunoslik va hujjatlarni tadqiq qilish ekspertizasi bilan shugʻullanadi. Bugun fuqarolar orasida firibgarlik holatlari koʻpayib ketishi barobarida, jinoyatlarni fosh etishda aynan hujjatlar ekspertizasining ahamiyati katta boʻlmoqda.

- Odamlar oʻzaro oldi-berdi munosabatlarida rasmiy hujjatlar tuzib, imzolar qoʻyishadi. Keyin esa “bu mening imzoim emas”, deb inkor qilish holatlari uchraydi, -deydi u. — Ana shunday vaziyatlarda ekspertiza haqiqatni ochib beradi.

Shuningdek, iqtisodiy jinoyatlarni tosh etishda, hujjatlarda yoʻl qoʻyilgan qonunbuzarliklarni aniqlashda ham ekspertiza ishlari hal qiluvchi ahamiyatga ega. Shu tariqa, bir oyda oʻrtacha 30-40 ta ishning ijobiy yechimi topilishiga hissa qoʻshyapman.

U faqat oʻz kasbining ustasi emas, balki izlanuvchan, bilimga chanqoq xodim ham. Bu esa turli koʻrik-tanlovlardagi natijalarda yaqqol namoyon boʻlgan. “Eng yaxshi ekspert”, “Zakovat”, “Kitobxon ayol”, “Temur tuzuklari bilimdoni”, “Ajdodlar izidan” kabi respublika miqyosidagi koʻrik-tanlovlarda munosib oʻrinlarni egallagani bunga yaqqol misoldir. 2025-yili esa “Toʻmaris” koʻkrak nishoni bilan taqdirlandi.

Mutolaani hech qachon toʻxtatmayman. Ayni paytda ham huquqiy risolalar oʻqib, kelgusi rejalarimni ilmiy yondashuvlar asosida quryapman. Bunda ustozim, isteʼfodagi polkovnik Gʻulomjon Rahimovning yordamlari katta boʻlmoqda, — deydi u mamnunlik bilan.

Toʻgʻri, Dilbarxon ustozlardan yolchigan. Qay bir ishga qoʻl urmasin, hamisha ustozlari koʻmakka shay. Biroq kasbiy muvaffaqiyati ortida oilaviy tarbiya, sabr va matonat turgani uning hayot yoʻlida yanada yaqqol koʻrinadi.

Otam rahmatli 14 yoshimda olamdan oʻtgan, — deydi u afsus bilan. — Shu sababli turmush tashvishlari onam Nargizaxon Umarova yelkasida qolgan. I U kishi ham hamshira, ham oʻqituvchi sifatida ishlab, men va ukalarimning taʼlim olishi uchun barcha sharoitlarni yaratdi. Onamning mehnatda fidoyiligi, tarbiyasi menga hayotda ham, xizmatda ham kuch bagʻishladi.

Bugun unga havas qilgan, undan oʻrnak olgan Ikki nafar ukasi oliy taʼlim muassasalarida tahsil olmoqda. Oʻzi esa hamkasblari orasida ham ibrat namunasi boʻlib kelmoqda.

Insonning muvaffaqiyati yoshga emas, bilimga bogʻliq. Xodim qanchalik bilimli boʻlsa, muvaffaqiyatning oʻzi uning ortidan ergashib yuradi. Katta leytenant Dilbarxon Umarova faoliyati bunga yana bir bor ishonch hosil qilishimizga sabab boʻldi.

©️ “Postda” gazetasi, Saminjon Husanzoda, Andijon viloyati.