Oʻzbekiston Respublikasi Kriminologiya tadqiqot instituti va Toshkent Kimyo xalqaro universiteti oʻrtasida hamkorlik toʻgʻrisida memorandum imzolandi
2024-05-29 11:25:00 / Yangiliklar
Xabaringiz bor, Oʻzbekiston Respublikasi Prezidentining 2024-yil 15-yanvarda «Jamoat xavfsizligini taʼminlash va jinoyatchilikka qarshi kurashish sohasini ilmiy tadqiq qilish faoliyatini sifat jihatidan yangi bosqichga koʻtarish chora-tadbirlari toʻgʻrisida»gi farmoni va «Kriminologiya sohasida ilmiy-amaliy tadqiqot ishlarini tashkil etish chora-tadbirlari toʻgʻrisida»gi qarori qabul qilingan edi. Mazkur farmon va qarorlar asosida Ichki ishlar vazirligi tizimida Oʻzbekiston Respublikasi Kriminologiya tadqiqot instituti tashkil etildi.
Ayni kunda tadqiqot instituti tomonidan jinoyatchilik tendensiyalarini kompleks ilmiy tahlil va prognoz asosida aniqlash, jinoyatchilikning ijtimoiy, iqtisodiy, psixologik, maʼnaviy-maʼrifiy, huquqiy, tibbiy va tashkiliy omillarini kompleks ilmiy diagnoz asosida aniqlash, shuningdek, qonunchilik va huquqni qoʻllash amaliyotini takomillashtirish orqali jinoyatchilikning salbiy tendensiyalari hamda uning omillarini bartaraf etish choralarini ishlab chiqish, hududlar kesimida kriminogen vaziyatni barqarorlashtirish choralarining samaradorligini ilmiy jihatdan baholash kabi bir qator ustuvor vazifalarni amalga oshirib kelmoqda. Zamon talabidan kelib chiqqan holda ayni kunda tadqiqot obyektlarini kengaytirish, har qanday jinoyatlarni chuqur ilmiy tahlil qilish doirasida ustuvor vazifalar belgilandi.
Shu maqsadda Kriminologik faoliyatni ilmiy va ekspertlik jihatidan taʼminlash boʻyicha Oʻzbekiston Respublikasi Kriminologiya tadqiqot instituti va Toshkent Kimyo xalqaro universitetlari oʻrtasida hamkorlikni yoʻlga qoʻyish maqsadida memorandum imzolandi.
Mazkur kelishuv asosida endilikda Toshkent Kimyo xalqaro universitetida kriminologiya boʻyicha oʻquv mashgʻulotlari oʻtkazish, kriminologik faoliyatni ilmiy va ekspertlik jihatidan taʼminlashda uslubiy yordam koʻrsatish, qoʻshma kriminologik tadqiqotlarni amalga oshirish uchun xalqaro grantlarni jalb etish, dunyo ilm-fani va texnologiyalari ilgʻor yutuqlaridan kriminologik faoliyat samaradorligini oshirishda foydalanish shuningdek, yurtimizda kriminologiya ilmiy maktablarining jahon miqyosida oʻz oʻrniga ega boʻlishini taʼminlash maqsad qilingan.