Surxondaryo viloyati IIBda Prezident topshiriqlari ijrosi va 2025-yil xizmat faoliyati yakunlari boʻyicha sarhisob yigʻilishi boʻlib oʻtdi
2026-02-02 10:00:00 / Yangiliklar
Surxondaryo viloyati ichki ishlar boshqarmasida joriy yilning 27-yanvar kuni Prezidentimiz rahbarligida oʻtkazilgan yigʻilishda berilgan topshiriqlar hamda 2025-yil davomida mahallalarda xavfsiz muhitni yaratish borasida amalga oshirilgan ishlar, yoʻl qoʻyilgan kamchiliklar sarhisobiga bagʻishlangan yigʻilish boʻlib oʻtdi.
Oʻzbekiston Respublikasi Ichki ishlar vaziri oʻrinbosari, polkovnik Ramazon Ashropov hamda Surxondaryo viloyati Ichki ishlar boshqarmasi boshligʻi, polkovnik Timur Ismailov, boshqarma boshligʻi oʻrinbosarlari, sohaviy xizmat hamda shahar-tuman IIB rahbarlari ishtirokida 2025-yildagi xizmat faoliyati yakunlari boʻyicha sarhisob yigʻilishi oʻtkazildi.
Yigʻilishda, Ichki ishlar vaziri oʻrinbosari, polkovnik Ramazon Ashropov tomonidan qonun ustuvorligini taʼminlash, jinoyatlarni hisobdan yashirish holatlariga yoʻl qoʻymaslik hamda vazirlik Akademiyasi professor oʻqituvchilari ishtirokida tashkil etilayotgan oʻquv-amaliy mashgʻulotlari davomida xodimlarning bilim saviyasini oshirish boʻyicha bir qator vazifalar belgilab berildi.
Shuningdek Prezidentimiz tomonidan Toshkent shahrida xavfsiz muhitni shakllantirish boʻyicha oʻtkazilgan tanqidiy selektor yigʻilishida belgilangan vazifalar, xususan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish boʻyicha “poytaxt namunasi”ni Surxondaryo viloyatida joriy etish masalalari muhokama qilindi.
Viloyat IIB boshligʻi soʻzga chiqib, viloyatdagi kriminogen vaziyat haqida axborot berdi. Davlatimiz rahbarining mahallalarda xavfsiz muhitni yaratishga qaratilgan qarorining mazmun-mohiyati, ijrosini taʼminlashda yettilik va huquqni muhofaza qiluvchi boshqa organlar bilan hamkorlikni mustahkamlash lozimligi.
Bundan tashqari fuqarolar murojaatlarini tez va sifatli hal etish, xizmat intizomi hamda qonunchilik talablariga qatʼiy rioya etish yuzasidan tegishli koʻrsatmalar berildi.
Xususan, tergovga qadar tekshiruvni amalga oshiruvchi xodimlarni (tezkor qidiruv, profilaktika xizmatlari, tergovchi va surishtiruvchilar) oʻqitish, ularning huquqiy bilimini oshirish maqsadida Tergov departamenti masʼullari, IIV Akademiyasi professor-oʻqituvchilaridan iborat ishchi guruh tomonidan rejalashtirilgan oʻquv-seminarlari boʻyicha vazifalar belgilab berildi.
Bu kabi seminarlar respublikaning barcha hududlarida oʻtkazilishi rejalashtirilgan boʻlib, hozirda Samarqand va Andijon viloyatlarida tashkil etildi.
Shuningdek, barcha hududlarda Huquqni muhofaza qilish akademiyasi tomonidan ushbu soha vakillarini onlayn ravishda oʻqitish boʻyicha tegishli chora-tadbirlar belgilab olindi.
Surxondaryo viloyati IIB Axborot xizmati