Toshkent shahrida xavfsiz muhitni yaratish boʻyicha “poytaxt namunasi” Chilonzor tumanida joriy etilmoqda
2026-01-31 14:00:00 / Yangiliklar
Ichki ishlar vaziri general-leytenant Aziz Tashpulatov ishtirokida, Toshkent shahrining huquqni muhofaza qilish organlari rahbarlari va xodimlari, Chilonzor tuman hokimi hamda hamkor tashkilotlarning masʼullari ishtirokida Toshkent shahri Chilonzor tumanida xavfsiz muhitni shakllantirish va jamoat xavfsizligini ishonchli taʼminlash masalalari boʻyicha jalb etilgan shaxsiy tarkibning kengaytirilgan xizmat oldi yoʻriqnomasi boʻlib oʻtdi.
Tadbirda Oʻzbekiston Respublikasi Prezidenti tomonidan Toshkent shahrida oʻtkazilgan tanqidiy selektor yigʻilishida belgilangan vazifalar ijrosi, jumladan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish boʻyicha “poytaxt namunasi”ni Chilonzor tumanida joriy etish masalalari muhokama qilindi.
Taʼkidlanganidek, tuman aholisi va transport oqimining ortishi xavfsizlikni taʼminlashda yangi yondashuvlarni talab etmoqda. Shu bois kriminogen omillarni barvaqt aniqlash va oldini olishga qaratilgan tizimli ishlarni kuchaytirish ustuvor vazifa etib belgilandi.
Jumladan, Chilonzor tumanida xavfsiz muhitni yaratishda patrul-post, yoʻl-patrul, qoʻriqlash va profilaktika xizmatlari tun-u kun, uch smenali xizmati davomida eʼtibor qaratilishi zarur boʻlgan asosiy jihatlar tushuntirib oʻtildi.
Eng muhimi, aksariyat jinoyat va huquqbuzarliklarning sodir etilishi tungi vaqtga toʻgʻri kelayotganligini inobatga olgan holda, tungi xizmatga alohida masʼuliyat bilan yondashish zarurligi taʼkidlandi. Masʼullarga har bir kelib tushgan xabar boʻyicha voqea joyiga naryadlarning 5 daqiqa ichida yetib borishini taʼminlash boʻyicha koʻrsatmalar berildi.
Shuningdek, Chilonzor tumani hokimligi tomonidan oʻz hududida namunali xizmat faoliyatini tashkil etgan profilaktika inspektorlari doimiy ragʻbatlantirish masalalari yoʻlga qoʻyilishini taʼkidlab oʻtdi.
Yoʻriqnoma yakunida xizmat vazifasini bajarishda safdoshlariga oʻrnak boʻlayotgan bir guruh ichki ishlar organlari xodimlari Ichki ishlar vaziri hamda tuman hokimligi tomonidan taqdirlandi.
Tadbirdan soʻng barcha shaxsiy tarkib va biriktirilgan masʼullar belgilangan topshiriqlarning ijrosini taʼminlash va oʻz xizmat vazifalarini bajarish uchun mahallalarga yoʻnalishdi.