Buxoro viloyati IIB rahbariyati ishtirokida Qorakoʻlda yoshlar bilan uchrashuv boʻlib oʻtdi
2026-01-31 09:00:00 / Yangiliklar
Qorakoʻl tumanida yoshlarning dardu tashvishlarini tinglash, ularning ijtimoiy faolligini oshirish va muammolariga amaliy yechim topish maqsadida viloyat Ichki ishlar boshqarmasi boshligʻi hamda tuman hokimi ishtirokida samimiy muloqot oʻtkazildi.
Ushbu tadbirga tumandagi otaliqqa olingan yoshlar hamda uyushmagan yoshlardan iborat jami 200 nafardan ziyod yigit-qizlar taklif etildi.
Viloyat Ichki ishlar boshqarmasi boshligʻi uchrashuv avvalida oʻzining hayotiy tajribasi, kasbiy faoliyatidagi qiyinchiliklar va muvaffaqiyatga erishishda sabr-toqat hamda bilimning oʻrni haqida soʻzlab berdi. Bu samimiy suhbat Qorakoʻllik yoshlarda kelajakka boʻlgan ishonchni yanada mustahkamladi.
Ochiq muloqot davomida yoshlar tomonidan oʻrtaga tashlangan har bir masala sinchiklab oʻrganildi. Asosiy eʼtibor uyushmagan yoshlarni doimiy ish oʻrinlari bilan taʼminlash, yoshlarning biznes loyihalarini qoʻllab-quvvatlash uchun subsidiyalar ajratish, moddiy koʻmakka muhtoj oila farzandlarining kontrakt toʻlovlari va sogʻligʻini tiklash masalalariga qaratildi.
Uchrashuv davomida koʻtarilgan koʻplab murojaatlar joyida ijobiy hal etildi. Vaqt talab qiladigan, ayniqsa, ish bilan taʼminlash, tadbirkorlik va subsidiya bilan bogʻliq masalalar boʻyicha tuman mutasaddilariga aniq vazifalar yuklatilib, ijrosi nazoratga olindi.
Ijtimoiy faolligi va iqtidori bilan tengdoshlariga oʻrnak boʻlayotgan bir guruh yoshlar rahbarlar tomonidan kitoblar jamlanmasi hamda esdalik sovgʻalari bilan taqdirlandilar. El ardogʻidagi nuroniylarning duolari uchrashuvga oʻzgacha yakun yasadi.
Buxoro viloyati IIB Axborot xizmati