Samarqand viloyati Ichki ishlar boshqarmasining 2025-yildagi xizmat faoliyati yakunlari boʻyicha sarhisob yigʻilishi boʻlib oʻtdi
2026-01-31 09:00:00 / Yangiliklar
Oʻzbekiston Respublikasi Ichki ishlar vaziri oʻrinbosari, polkovnik Ramazon Ashropov hamda Samarqand viloyati Ichki ishlar boshqarmasi boshligʻi, general-mayor Toxir Aripov huzurida viloyat Ichki ishlar boshqarmasining 2025-yildagi xizmat faoliyati yakunlari boʻyicha sarhisob yigʻilishi oʻtkazildi
Yigʻilishda, Ichki ishlar vaziri oʻrinbosari, polkovnik Ramazon Ashropov tomonidan qonun ustuvorligini taʼminlash, jinoyatlarni hisobdan yashirish holatlariga yoʻl qoʻymaslik hamda vazirlik Akademiyasi professor oʻqituvchilari ishtirokida tashkil etilayotgan oʻquv-amaliy mashgʻulotlari davomida xodimlarning bilim saviyasini oshirish boʻyicha bir qator vazifalar belgilab berildi.
Yigʻilishda Oʻzbekiston Respublikasi Prezidenti tomonidan Toshkent shahrida xavfsiz muhitni shakllantirish boʻyicha oʻtkazilgan tanqidiy selektor yigʻilishida belgilangan vazifalar, xususan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish boʻyicha “poytaxt namunasi”ni Samarqand viloyatida joriy etish masalalari muhokama qilindi.
Shuningdek, Boshqarmaning sohaviy xizmatlari va quyi tizimlari tomonidan 2025-yil mobaynida amalga oshirilgan chora-tadbirlar, erishilgan natijalar hamda mavjud kamchiliklar yuzasidan masʼul rahbarlarning axborotlari eshitildi.
Samarqand viloyati IIB Axborot xizmati