Andijon viloyati IIB rahbariyatining Baliqchi tumanida aholining ijtimoiy va huquqiy masalalardagi murojaatlarini hal etishga qaratilgan sayyor qabuli oʻtkazildi
2026-01-30 11:50:00 / Yangiliklar
Aholining ijtimoiy va huquqiy masalalardagi murojaatlarini joyida hal etish, fuqarolarni oʻylantirayotgan muammolarni bevosita oʻrganish maqsadida joriy yilning 29-yanvar kuni Andijon viloyati IIB boshligʻi, polkovnik Sanjar Djabarov tomonidan Baliqchi tumanida sayyor qabul tashkil etildi.
Qabul jarayonida ichki ishlar organlari xodimlari bilan bir qatorda tegishli davlat idoralari vakillari ham ishtirok etdi.
Sayyor qabul davomida fuqarolar tomonidan ishga joylashish, tadbirkorlik faoliyatini yoʻlga qoʻyish, kredit mablagʻlari ajratish, probatsiya hisobidagi shaxslarga oid masalalar hamda boshqa ijtimoiy-huquqiy muammolar yuzasidan murojaatlar bildirildi. Barcha murojaatlar belgilangan tartibda koʻrib chiqildi.
Shuningdek, ichki ishlar organlariga biriktirilgan yoshlarning murojaatlarini hal etishga alohida eʼtibor qaratildi. Ayrim murojaatlar sayyor qabul jarayonidayoq ijobiy hal etildi, qolgan masalalar esa qoʻshimcha oʻrganish uchun nazoratga olinib, ular boʻyicha masʼullarga tegishli topshiriqlar berildi.
Andijon viloyati IIB rahbariyati tomonidan aholi murojaatlarini joyida koʻrib chiqish amaliyoti tizimli ravishda davom ettirilib, bu kabi sayyor qabullar kelgusida ham shahar va tumanlarda oʻtkazilishi rejalashtirilgan.
Andijon viloyati IIB Axborot xizmati