Namangan viloyatida ijtimoiy-iqtisodiy rivojlanish va hududlarda xavfsiz muhitni taʼminlash masalalari muhokama qilindi
2026-01-30 11:30:00 / Yangiliklar
Namangan shahridagi “Maʼrifat maskani”da Xalq deputatlari viloyat Kengashining oʻn sakkizinchi sessiyasi boʻlib oʻtdi. Unda viloyat Kengashi deputatlari, viloyat hokimi va uning oʻrinbosarlari, huquqni muhofaza qiluvchi organlar hamda masʼul tashkilot rahbarlari ishtirokida hududning ijtimoiy-iqtisodiy rivojlanishi, mahalliy byudjet ijrosi va 20 ga yaqin boshqa muhim masalalar atroflicha koʻrib chiqildi. Sessiya davomida viloyat IIB boshligʻining 2025-yil davomida jinoyatchilikning oldini olish va mahallalarda xavfsiz muhitni shakllantirish borasidagi hisoboti hamda Yoʻl harakati xavfsizligi boshqarmasi boshligʻining yoʻl infratuzilmasini yaxshilash boʻyicha amalga oshirgan ishlari yuzasidan maʼlumotlari tinglandi.
Shu bilan birga, hududda Oʻzbekiston Respublikasi Prezidentining 2026-yil 5-yanvardagi PQ-1 va PQ-2-sonli qarorlari ijrosini taʼminlash maqsadida viloyat Ichki ishlar boshqarmasi rahbariyatidan iborat ishchi guruh tomonidan izchil oʻrganishlar olib borilmoqda. Xususan, ishchi guruh aʼzolari Mingbuloq va Toʻraqoʻrgʻon tumanlarida boʻlib, kriminogen vaziyati ogʻir boʻlgan “qizil” toifadagi mahallalar faoliyatini tahlil qildilar. Jarayonda Mingbuloq tumanidagi “Farovon” hamda Toʻraqoʻrgʻon tumanidagi “Gulqishloq” mahallalarida sodir etilgan oʻta ogʻir turdagi jinoyatlarning kelib chiqish sabablari va ularga imkon bergan shart-sharoitlar mutasaddilar ishtirokida alohida muhokama etildi.
Oʻrganish ishlari doirasida Mingbuloq tumanining “Mustaqillik” va Toʻraqoʻrgʻon tumanining “Turkiston” mahallalarida ham Prezident qarorlari ijrosini samarali tashkil etish boʻyicha koʻrsatmalar berildi. Masʼul idoralar va biriktirilgan xodimlar oʻrtasida oʻzaro hamkorlikni kuchaytirish, aholi osoyishtaligini taʼminlash uchun manzilli profilaktik chora-tadbirlarni amalga oshirish yuzasidan aniq vazifalar belgilab berildi. Bu kabi tadbirlar viloyat hududida jinoyatchilikning barvaqt oldini olish va aholi xavfsizligini mustahkamlashga qaratilgan.
Namangan viloyati IIB Axborot xizmati