Fargʻona viloyatida xavfsizlikni taʼminlash, narkojinoyat va kibertahdidlarga qarshi yangi tizim va barqaror jamiyatni shakllantirish qaratilgan qatʼiy chora-tadbirlar
2026-01-29 21:00:00 / Yangiliklar
Tadbirda, viloyat hokimi, huquqni muhofaza qilish organlari rahbarlari, hamkor idoralarning masʼullari hamda tuman, shahar ichki ishlar boʻlinmalarining shaxsiy tarkibi ishtirok etdilar.
Tadbirda Oʻzbekiston Respublikasi Prezidenti Shavkat Mirziyoyev raisligida Toshkent shahrida xavfsiz muhitni shakllantirish hamda jamoat xavfsizligini samarali taʼminlash boʻyicha namunaviy amaliyotni yaratish chora-tadbirlari yuzasidan videoselektor yigʻilishida belgilab berilgan vazifalarning ijrosi atroflicha muhokama qilindi.
Davlat rahbarining tashabbuslari natijasida Toshkent shahri Chilonzor tumanida qoʻllanilgan ilgʻor tajribani Fargʻona viloyatida amaliyotga joriy etish masalasiga alohida eʼtibor qaratildi. Qayd etilishicha, mazkur tumanda amalga oshirilgan kompleks chora-tadbirlar natijasida 2025-yilning ikkinchi yarmiga kelib “qizil” toifadagi mahallalar toʻliq bartaraf etilgan.
Shuningdek, yigʻilishda Fargʻona shahar va Qoʻqon shahrida jinoyatchilik salmogʻi oshib ketganligi keskin tanqid qilindi.
Shundan kelib chiqqan holda, 2026-yilda Fargʻona viloyatida xavfsiz hududlarni yaratish maqsadida qator aniq chora-tadbirlar belgilandi. Jumladan, viloyatdagi barcha 1015 ta mahallada xavfsiz muhitni taʼminlash boʻyicha kompleks ishlar olib borish, ijtimoiy profilaktika tizimi doirasida “xonadonbay” ishlashning namunaviy tartibini joriy etish rejalashtirildi.
Shuningdek, narkojinoyatchilik va uyushgan jinoyatchilikka qarshi kurashish, ayollar va bolalarga nisbatan zoʻravonlikning oldini olish boʻyicha masʼul idoralar bilan hamkorlikda tizimli ishlar amalga oshirish, tuman va shaharlardagi, shu jumladan xususiy taʼlim muassasalarida “Yoʻl-transport hodisalaridan holi maktab” loyihalarini joriy etish rejalashtirildi.
Viloyat hududida qoʻshimcha zamonaviy videokuzatuv kameralari oʻrnatilib, ularni Ichki ishlar boshqarmasining “Yagona tezkor boshqaruv markazi”ga bosqichma-bosqich integratsiya qilish, shuningdek, koʻngilochar maskanlar, savdo majmualari va ommaviy tadbirlar oʻtkaziladigan joylarda jamoat tartibini taʼminlash boʻyicha kompleks choralar belgilandi.
Yigʻilishda internet orqali firibgarlik, shaxsiy maʼlumotlarni noqonuniy egallash va elektron toʻlov tizimlariga tajovuz qilish bilan bogʻliq jinoyatlar profilaktikasiga alohida eʼtibor qaratish zarurligi taʼkidlandi. Bu maqsadda axborot texnologiyalari sohasida jinoyatlarni barvaqt aniqlash va oldini olishga qaratilgan zamonaviy tahlil usullarini joriy etish vazifasi qoʻyildi.
Shuningdek, har bir ogʻir va oʻta ogʻir jinoyat yuzasidan uning sabab va shart-sharoitlarini chuqur oʻrganib, jinoyatlarga olib kelayotgan omillarni bartaraf etish hamda profilaktik tadbirlarni kuchaytirish boʻyicha masʼul idoralarga aniq topshiriqlar berildi.
Yigʻilishda tashkiliy masala ham koʻrib chiqildi.
Ichki ishlar vazirining buyrugʻiga muvofiq, polkovnik Ayubxon Raxmatullayev Fargʻona viloyati Ichki ishlar boshqarmasi boshligʻi lavozimiga tayinlandi.
Shuningdek, viloyat IIBni koʻp yillardan beri boshqarib kelib, hozirda Davlat rahbarining farmoni bilan Oʻzbekiston Respublikasi Favqulotda vaziyatlar vaziri etib tayinlangan general-mayor Azizbek Ikramov tantanali ravishda kuzatildi.
Tadbirda ishtirokchilarning taklif va mulohazalari tinglandi, yangi tayinlangan rahbarga belgilangan vazifalarni izchil bajarish yuzasidan muhim vazifalarni qamrab olgan istiqbolga qaratilgan dastur ishlab chiqish vazifasi yuklatildi.