Yoshlar — kelajak bunyodkori. Nozik nuqtada turib
2026-01-29 23:00:00 / Yangiliklar
Jinoyat va haqiqat oʻrtasidagi nozik nuqtada turib ish olib borish masʼuliyatli vazifa. Termiz shahar IIB huzuridagi Tergov boʻlimi katta tergovchisi, katta leytenant Muhayyo Qudratova ana shunday sharafli vazifani sidqidildan bajarib kelayotgan fidoyi xodimlardan biridir.
Xizmat faoliyatini Denov tumani IIB huzuridagi Tergov boʻlimi surishtiruvchiligidan boshlagan lavhamiz qahramoni kasbiy kamolot yoʻlida dadil qadam tashlab kelmoqda.
Firibgarlik, bezorilik, giyohvandlik moddalari oldi-sotdisi kabi murakkab jinoyatlarni fosh etishdagi faol ishtiroki, dalillar bilan ishlashdagi sinchkovligi uni sohaning bilimdon mutaxassislaridan biri sifatida tanitdi.
Binobarin, tergov jarayonida har bir holatga xolisona, qonun doirasida yondashish Muhayyo Qudratovaning faoliyatida ustuvor tamoyil hisoblanadi.
Jinoyatlarni ochishda “kalavaning uchini topish”, dalillarni toʻplash, inson taqdiriga daxldor qarorlar qabul qilish har doim ham oson kechmaydi, — deydi u. — Aslida, tergovchi boʻlishimga otam sababchi boʻlgan.
Bugun u men bilan faxrlanishini koʻrib, quvonaman. Toʻgʻri, baʼzan qiyin, jumboqlarga toʻla voqealar sodir boʻladi.
Biroq otamning bildirgan ishonchi va turmush oʻrtogʻimning qoʻllab-quvvatlovi menga dalda boʻladi.
Darvoqe, katta leytenant Muhayyo Qudratova 2024-yilda viloyat IIB huzuridagi Tergov boshqarmasi tomonidan “Yilning eng yaxshi tergovchi ayol xodimasi” deb topilgani eʼtiborga loyiq.
Bu eʼtirof nafaqat shaxsiy yutuq, balki ayollarning tergov kabi murakkab sohada munosib oʻrin egallayotganining yaqqol isbotidir.
Muhayyo Qudratova xizmat bilan bir qatorda, sportga ham alohida eʼtibor qaratadi. Voleybol bilan muntazam shugʻullanib, Tergov boshqarmasi jamoasi aʼzosi sifatida viloyat va viloyatlararo musobaqalarda gʻalabalarni qoʻlga kiritishda faol qatnashgani uning irodali, jamoaviy ruhga ega shaxs ekanini koʻrsatadi.
©️ “Postda” gazetasi, Feruza Rahmonqulova, Surxondaryo viloyati.