Andijon viloyatida ijtimoiy-maʼnaviy barqarorlikni taʼminlash boʻyicha amalga oshirilayotgan ishlar muhokama qilindi
2026-01-29 09:00:00 / Yangiliklar
Andijon viloyati IIBda oʻtkazilgan navbatdagi yigʻilishda viloyatda ijtimoiy-maʼnaviy muhit barqarorligini taʼminlash borasida amalga oshirilayotgan ishlar holati atroflicha muhokama qilindi.
Jumladan, mazkur yoʻnalishda ishlarni yanada jadallashtirish, 2025-yil davomida bajarilgan vazifalar hamda yoʻl qoʻyilgan kamchiliklar tanqidiy-tahliliy ruhda koʻrib chiqildi.
Tadbir davomida viloyat hududlarida faoliyat olib borayotgan “Qaytaruv guruhlari” tomonidan tashkil etilayotgan ilmiy-maʼrifiy suhbatlar va tushuntirish ishlarining ahamiyati alohida taʼkidlandi.
Ushbu ishlar natijasida aholi orasida radikal gʻoyalarga qarshi immunitet shakllanib, diniy-maʼrifiy sohada amalga oshirilayotgan islohotlarga nisbatan xayrixohlik va ishonch mustahkamlanib borayotgani qayd etildi.
Yigʻilish yakunida adashgan shaxslarni toʻgʻri yoʻlga qaytarish, “jaholatga qarshi maʼrifat” tamoyili asosida tizimli ishlarni davom ettirish yuzasidan tegishli mutasaddi tashkilotlarga aniq vazifa va topshiriqlar berildi.
Shuningdek, kelgusida amalga oshirilishi lozim boʻlgan ustuvor chora-tadbirlar belgilab olindi.
Andijon viloyati IIB Axborot xizmati