Toshkent shahar IIBBda “Fidoyi ayol xodima” koʻrik-tanlovi gʻoliblari aniqlandi
2026-01-25 10:00:00 / Yangiliklar
Oʻzbekiston respublikasi Prezidentining ichki ishlar organlarini xalqchil professional tuzilmaga aylantirish va aholi bilan yanada yaqin hamkorlikda ishlashga yoʻnaltirish boʻyicha qabul qilingan qarori asnosida Ichki ishlar vazirligi tomonidan ichki ishlar organlarida “Fidoyi ayol xodima” koʻrik-tanlovi oʻtkazib kelinmoqda.
Bundan koʻzlangan maqsad, ichki ishlarda xizmat olib borayotgan shahodatlagan ayol xodimalarning kasbiy bilim va malakalari oshirilishini qoʻllab-quvvatlash, faoliyatida yutuqlarga erishib kelayotganlarni moddiy va maʼnaviy ragʻbatlantirish, oʻz kasbining bilimdonlari oʻrtasida sogʻlom raqobat muhitini shakllantirish, ularning tashabbuskorligini oshirish, innovatsion, ijodiy qiziqishlarini amaliyotga keng tatbiq etishdan iborat.
Mazkur koʻrik-tanlovning navbatdagisi joriy yilning 13-14-yanvar kunlari boʻlib oʻtdi. Unda Toshkent shahar IIBBda xizmat olib borayotgan 21 nafar xodimalar qatnashdi.
Tanlov ishtirokchilarning jismoniy tayyorgarlik darajasini aniqlash: kompleks mashqlarni bajarish va 1000 metr masofaga yugurish, jangovar tayyorgarlik darajasini aniqlash boʻyicha “Makarov” pistoletini toʻliqsiz qismlarga ajratish va yigʻish, amaliy oʻq uzish, nishonga olish va harakatlanmaydigan nishonga otish tartibi, bilim darajasini aniqlashga qaratilgan elektron test sinovlari hamda yakuniy baholash bilan bogʻliq toʻrt bosqichda oʻtkazildi.
Har bir bosqichda belgilangan shartlarni toʻgʻri va aniq bajarilishi jarayonlarini hakamlar diqqat va sinchkovlik bilan kuzatib, baholab bordilar. Tanlov yakuniga koʻra: 1-oʻrin Mirzo Ulugʻbek tumani IIO FMB huzuridagi tergov boʻlimi katta tergovchisi, mayor Klara Narmanovaga, 2-oʻrin Mirzo Ulugʻbek tumani IIO FMB HPB voyaga yetmaganlar masalalari boʻyicha katta inspektor-psixologi, kapitan Mohinur Madirahimovaga, 3-oʻrin Yunusobod tumani IIO FMB huzuridagi Tergov boʻlimi tergovchisi, mayor Nilufar Janiyevaga nasib etdi.
Gʻoliblarga diplom va esdalik sovgʻalari tantanali ravishda topshirildi. Koʻrik-tanlovda gʻolib boʻlgan ayol xodimalarni erishgan yutuqlari bilan tabriklab, oilalari hamda xizmat faoliyatlarida yangi-yangi muvaffaqiyatlar tilab qolamiz.
Toshkent shahar IIBB Axborot xizmati