Yangi Oʻzbekiston yoshlar siyosati amalda: Qoraqalpogʻistonda xavfsiz jamiyat, barqaror taraqqiyot va inson kapitalini rivojlantirishga qaratilgan ochiq muloqot
2026-01-25 08:00:00 / Yangiliklar
Tadbirda, Ichki ishlar vaziri general-leytenant Aziz Tashpulatov, Qoraqalpogʻiston Respublikasi Joʻqorgʻi Kengesi raisi Amanbay Orinbayev, yoshlar, oʻquvchi va talabalarning kelajagiga masʼul boʻlgan barcha tashkilotlar va ichki ishlar organlari xodimlari ishtirok etdilar.
Uchrashuv jarayonida, oʻtgan xatolaridan oʻrinli xulosa chiqargan holda bugun jamiyatda oʻz soʻzi va oʻrniga ega boʻlishga intilayotgan, probatsiya hisobidagi hamda ichki ishlar organlari rahbarlariga biriktirilgan uyushmagan yoshlarning muammolari atroflicha tinglanib, ularning taklif va mulohazalari muhokama qilindi.
Ochiq muloqot shaklida oʻtgan uchrashuvda 400 nafarga yaqin yoshlar ishtirok etib, oʻz murojaatlarini toʻgʻridan-toʻgʻri vazirlik va idoralarning rahbarlariga yoʻllash imkoniyatiga ega boʻlishdi. Tadbirkorlikni yoʻlga qoʻyish, chet tillari, axborot texnologiyalari va boshqa zamonaviy kasblarni oʻrganish, ishga joylashish kabi masalalar yuzasidan yoʻllangan murojaatlarning 38 tasi shu yerning oʻzida hal etildi. Yana qoʻshimcha 26 ta murojaat yuzasidan masʼullarga tegishli koʻrsatmalar berilib, ularning ijrosi nazoratga olindi.
Tadbirda, yoshlar orasida iqtidorlarni kashf etish, sport, taʼlim, hunarmandchilik va kichik biznesga jalb qilish orqali bandligini taʼminlash va oʻz kelajagini qurishga bugundan koʻmaklashish zarurligi taʼkidlandi. Yoshlar jinoyatchiligi koʻp kuzatilayotgan hududlar, mahallalar va taʼlim muassasalari bilan alohida ish olib borish boʻyicha vazifalar belgilab olindi.
Ayniqsa, Temurbeklar maktabi hamda Ichki ishlar vazirligi Akademik litseylarida uyushmagan yoshlarning qamrovini kengaytirish, ularni vatanparvarlik ruhida tarbiyalash borasida masʼuliyatni oshirish boʻyicha takliflar muhokama qilindi.
Voyaga yetmaganlar, oʻquvchi va talabalarni jinoyat koʻchasiga kirib qolishini oldini olish boʻyicha tizimli faoliyatni yoʻlga qoʻyish, ayniqsa maktablarga biriktirilgan inspektor psixologlar taʼlim muassasalardagi turli xavflarga, yoshlarning xarakteridagi oʻzgarishlarga tezda munosabat bildirib, bu toifadagi yoshlar bilan yakka tartibda shugʻullanish boʻycha vazifalar belgilandi.
Uchrashuv soʻngida fan-taʼlim, sport va madaniyat sohalarida tengdoshlariga oʻrnak boʻlayotgan 23 nafar iqtidorlik yoshlar taqdirlandi. Shuningdek 16 nafar tadbirkorlikni yoʻlga qoʻyish hunarmandchilik bilan shugʻullanish istagidagi ishtirokchilarga zaruriy jihozlar va texnik qurilmalar topshirildi.
Boʻlib oʻtgan ochiq va samimiy muloqot jarayoni kelajak egalari uchun yangi marralarni belgilash, jamiyatga har tomonlama manfaatli shaxs boʻlib yetishishda yoʻlida muhim turtki boʻldi.