Buxoro viloyati IIB boshligʻi Gʻijduvon tumani “Nodirabegim” mahallasida sayyor qabul va “mahalla yettiligi” bilan muloqot oʻtkazdi
2026-01-22 12:25:00 / Yangiliklar
Fuqarolarning murojaatlarini oʻz vaqtida koʻrib chiqish, ularning qonuniy huquq va manfaatlarini taʼminlash hamda mavjud muammolarga samarali yechim topish maqsadida, tasdiqlangan rejaga muvofiq, Buxoro viloyati Ichki ishlar boshqarmasi boshligʻi tomonidan Gʻijduvon tumani “Nodirabegim” mahalla fuqarolar yigʻini binosida navbatdagi sayyor qabul tashkil etildi.
Sayyor qabul davomida fuqarolar tomonidan ish bilan taʼminlashda amaliy yordam koʻrsatish, imtiyozli kredit olishda koʻmak berish, shuningdek, ichki ishlar organlari xodimlarining faoliyati bilan bogʻliq ayrim masalalar yuzasidan 10 ga yaqin murojaatlar kelib tushdi. Har bir murojaat yuzasidan fuqarolarga amaldagi qonunchilik asosida batafsil tushuntirishlar berildi.
Mazkur tadbir doirasida nafaqat sayyor qabul, balki “mahalla yettiligi” ishtirokida ochiq muloqot ham oʻtkazilib, “qizil” toifaga kiritilgan mazkur hududdagi kriminogen vaziyat atroflicha muhokama qilindi. Suhbat davomida mahallada jinoyatchilikning oldini olish, huquqbuzarliklar profilaktikasini kuchaytirish masalalariga alohida eʼtibor qaratildi.
Mahalla yettiligi bilan oʻtkazilgan muloqotda Oʻzbekiston Respublikasi Prezidentining 2026-yil 5-yanvardagi PQ–1 va PQ–2-son qarorlari talablariga muvofiq hududda kompleks chora-tadbirlarni belgilash, profilaktik ishlarni tizimli tashkil etish, ijtimoiy xavf omillarini bartaraf etish hamda kelgusida jinoyat sodir etilishiga yoʻl qoʻymaslik boʻyicha aniq vazifalar belgilab olindi.
Tadbir yakunida masʼullarga hududdagi kriminogen vaziyatni barqarorlashtirish, muammoli masalalarni manzilli hal etish, fuqarolar bilan ishlash samaradorligini oshirish yuzasidan tegishli topshiriqlar berildi hamda ularning ijrosi rahbariyat tomonidan qatʼiy nazoratga olindi.
Shuni alohida taʼkidlash joizki, bunday sayyor qabullar va mahalla yettiligi bilan oʻtkazilayotgan ochiq muloqotlar joylarda huquqbuzarliklarning oldini olish, aholi bilan samarali hamkorlikni mustahkamlash, ichki ishlar organlari faoliyatining ochiqligi va shaffofligini oshirish hamda jamiyatda qonun ustuvorligini taʼminlashda muhim ahamiyat kasb etadi.
Buxoro viloyati IIB Axborot xizmati