Oʻzbekiston Respublikasi delegatsiyasining Turkiya Respublikasiga rasmiy tashrifi: xavfsizlik va huquqni muhofaza qilish sohasida strategik hamkorlik yangi bosqichda
2026-01-21 14:00:00 / Yangiliklar
Oʻzbekiston Respublikasi delegatsiyasi tomonidan keng qamrovli strategik sheriklikni yanada mustahkamlash masalasida Turkiya Respublikasiga ishchi tashrif amalga oshirildi.
Tashrifda Oʻzbekiston Respublikasi Tashqi ishlar vazirligi boshchiligida mamlakatimiz huquqni muhofaza qilish organlari rahbarlaridan iborat delegatsiya ishtirok etdi.
Tashrif doirasida Oʻzbekiston Respublikasi delegatsiyasini Turkiya Respublikasi Prezidenti Rejep Tayyip Erdogʻan qabul qildi.
Shuningdek, Oʻzbekiston va Turkiya tashqi ishlar, ichki ishlar va mudofaa vazirlari hamda xavfsizlik xizmatlari rahbarlari ishtirokida “4+4” mexanizmi doirasida uchrashuv oʻtkazildi.
Tadbir, kun tartibiga muvofiq ikki tomonlama munosabatlarning eng dolzarb mavzulari, mintaqaviy masalalar va global jarayonlar, shuningdek barqaror rivojlanish va farovonlikni mustahkam xavfsizlik asosida taʼminlashga qaratilgan eng samarali hamkorlik yoʻllari muhokama qilindi.
Tashrif doirasida Oʻzbekiston Respublikasi Ichki ishlar vaziri general-leytenant Aziz Tashpulatovning Turkiya Respublikasi Ichki ishlar vaziri janob Ali Yerlikaya oʻrtasida ikki tomonlama uchrashuv tashkil etildi.
Tadbirda tomonlar ichki ishlar organlari oʻrtasidagi hamkorlikning bugungi holati, amaliy natijalari va kelgusidagi ustuvor yoʻnalishlari atroflicha koʻrib chiqildi.
Muzokaralar davomida tomonlar transmilliy jinoyatlarga qarshi kurashish, jamoat xavfsizligini taʼminlash, tezkor va samarali axborot almashish, migratsiya masalalari, ilgʻor tajriba va zamonaviy usullarni joriy etish borasidagi hamkorlik sezilarli darajada faollashganini alohida taʼkidladilar. Shuningdek, ichki ishlar organlari xodimlarining kasbiy salohiyatini oshirish, qayta tayyorlash va malakasini oshirish masalalarida tizimli hamkorlik yoʻlga qoʻyilgani qayd etildi.
Hamkorlikning ustuvor yoʻnalishlaridan biri sifatida kiberjinoyatchilikka qarshi kurash masalalari keng muhokama qilindi. Tomonlar raqamli xavf-xatarlarga qarshi samarali choralar koʻrish, kiberjinoyatlarni fosh etishda ilgʻor texnologiyalardan foydalanish, raqamli kriminalistika yoʻnalishida maxsus oʻquv kurslarini tashkil etish hamda bu sohada muntazam tajriba almashib borish muhim ekanini taʼkidladilar.
Shu bilan birga, terrorizm va ekstremizm, noqonuniy migratsiya, odam savdosi, giyohvand moddalarning noqonuniy aylanmasi kabi xalqaro miqyosdagi jinoyatlarga qarshi kurashish boʻyicha hamkorlikni yanada kuchaytirish masalalari ham muhokama markazida boʻldi.
Ayniqsa, Oʻzbekiston Ichki ishlar vazirligi tarkibida yangi tashkil etilgan Kriminologiya tadqiqot instituti bilan Turkiya Respublikasi Ichki ishlar vazirligi va Jandarmeriyasi huzuridagi ilmiy-tadqiqot markazlari oʻrtasida hamkorlik aloqalarini yoʻlga qoʻyishga alohida eʼtibor qaratildi.
Bu yoʻnalishda qoʻshma ilmiy tadqiqotlar oʻtkazish, tahliliy materiallar almashish va ilmiy-amaliy konferensiyalar tashkil etish istiqbollari belgilandi.
Uchrashuv yakunida migratsiya jarayonlarini tartibga solish, fuqarolarning oʻz davlatlariga qaytishiga koʻmaklashish hamda bu borada oʻzaro muvofiqlashgan chora-tadbirlarni amalga oshirish toʻgʻrisida Anglashuv memorandumi imzolandi.
Tashrif dasturi doirasida Oʻzbekiston Respublikasi Ichki ishlar vazirligi delegatsiyasi Turkiyaning huquqni muxofaza qilish organlari muassasalari faoliyati bilan batafsil tanishdi.
Jandarmeriya Bosh qoʻmondonligining Kuzatuv markazida, jamoat xavfsizligini taʼminlash, favqulodda holatlarga tezkor javob qaytarish, monitoring va boshqaruvning zamonaviy tizimlari bilan tanishildi.
Milliy Politsiya akademiyasida kadrlar tayyorlash, ilmiy tadqiqotlarni tashkil etish, oʻquv jarayonlariga innovatsion yondashuvlarni joriy etish boʻyicha Turkiya tajribasi atroflicha oʻrganildi.
Politsiya maxsus vazifalarni bajaruvchi bosh boshqarmasiga ham tashrif uyushtirildi. Unda maxsus boʻlinmalarning jismoniy va taktik tayyorgarligi, zamonaviy texnika va jihozlardan foydalanish imkoniyatlari, shuningdek maxsus operatsiyalarni oʻtkazish amaliyoti namoyish etildi.
Doʻstona, ochiq va konstruktiv ruhda oʻtgan mazkur tashrif Oʻzbekiston va Turkiya oʻrtasidagi hamkorlikni sifat jihatidan yangi bosqichga olib chiqish, ichki ishlar organlari oʻrtasida oʻzaro ishonchni mustahkamlash hamda xavfsizlik sohasidagi qoʻshma saʼy-harakatlarni yanada samarali tashkil etishga xizmat qiladi.