O‘zbеkiston Rеspublikаsi Ichki ishlаr vаzirligi

Yaqinda toʻyxonada bir yoshgina juvon yonimga kelib, quyuqqina soʻrashdi. Soʻng «Feruza opa, meni tanimadingiz-a, oyim ham sizga salom aytdilar, keyingi stolda oʻtiribdilar», — deb qoldi. «Singlim, rostan ham sizni tanimadim», dedim shoshib qolganimdan. Shunda u: «Opa, bundan bir necha yil ilgari ajrashmoqchi boʻlganimda, oilamni saqlab qolgansiz. Onam: «Ana Feruza opang», — deya koʻrsatdilar. Sizga rahmat aytmoqchiman, oʻshanda toʻgʻri maslahat bergan ekansiz. Hozir farzandim ikkita boʻldi, qaynonam bilan kelishib oldim, turmushim iziga tushib ketdi», — deganida, koʻzlarimga yosh kelib, uni mahkam quchib oldim. Bundan 2-3 yil ilgari qaynonasi bilan chiqisholmay, eridan nolib ajrashmoqchiligini aytib, yetti oylik chaqalogʻini bagʻriga bosib oldimga kelgan kelinchak edi. Bilasizmi, men uni shu onda esladim. Va xursand boʻldim, chunki koʻzlari baxtiyorlikdan chaqnab turardi...

Toshkent viloyati IIBB Ikkinchi mintaqaviy hudud Angren shahar IIB Huquqbuzarliklar profilaktikasi boʻlimi xotin-qizlar masalalari boʻyicha katta inspektori, podpolkovnik Feruza Matibragimova bilan suhbatlashsangiz, salkam oʻttiz yillik xizmat faoliyati bilan bogʻliq qalbini nurlantirib turuvchi ana shunday hayotiy misollarni goh koʻziga yosh olib, goh kulib soʻzlab beradi.

Fidoyi xodima ayni paytda Angren shahrida istiqomat qilayotgan 91280 nafar xotin-qizlar oʻrtasida jinoyatchilikning barvaqt oldini olishga masʼul, oilalardagi muammolarni tizimli oʻrganadi. Oʻz oʻrnida ishsiz, yordamga muhtoj, ogʻir ijtimoiy vaziyatga tushib qolgan xotin-qizlarga amaliy yordam berish maqsadida mahalla faollari, mutasaddi tashkilot va idoralar bilan hamkorlik qiladi. Shu oʻrinda oʻtgan 2025-yilda 917 nafar tazyiq va zoʻravonlikdan jabrlangan xotin-qizlarga himoya orderlari rasmiylashtirilganligini taʼkidlash joiz. Shuningdek, Probatsiya guruhi nazoratida turuvchi, ichkilikka ruju qoʻygan, jazoni ijro etish muassasasidan qaytgan xotin-qizlar bilan profilaktik suhbatlar oʻtkazish va ularning muammolariga yechim topish lavhamiz qahramonining kundalik vazifalarining muhim bir boʻlagiga aylanib ulgurgan.

— Ustozim Feruza opa sohaga oid huquqiy bilimlarni hayotiy misollar bilan erinmasdan tushuntiradi, — deydi leytenant Sevinch Abdugʻafforova. — Mahallalardagi oʻrganish, profilaktik suhbatlar jarayoniga birga olib borib, bevosita koʻrsatib tavsiyalar berib: «Yoshsan, oʻrganishing, oʻz ustingda ishlashing kerak», — deya taʼkidlaydilar. Men doim ustozimga munosib shogird boʻlishga, ular singari uzoq yillar tizimda samarali xizmat qilishga harakat qilaman.

Inson umri oqar suvga oʻxshaydi. Uni qadrlaganlar hayotda oʻrnini topadi. Feruza opa ham xizmatdagi ezgu amallari bilan hamkasblari, rahbarlari, yaqinlari, eng muhimi aholi ishonchini oqlab kelmoqda.

Ezgu maqsadli insonlardan yaqinlari ibrat olishga harakat qilishadi. Buni qahramonimizning ukasi isteʼfodagi mayor Botirali Matibragimov ham unga havas qilib, ichki ishlar organlariga xizmatga kirib, namunali faoliyat yuritib, yorugʻ yuz bilan pensiyaga chiqqanida, hozirda jiyanlari Jasurbek Satimov, Ravshanbek Matibragimov ham tizimda sidqidildan xizmat qilayotgani misolida yaqqol koʻrinadi. Soʻzimiz soʻngida aytarimiz shuki, podpolkovnik Feruza Matibragimova masʼuliyat va sharaf yonma-yon xizmatining har soniyasini uygʻoq yuragining nurli nuqtalariga aylantira olgan kasb fidoyilaridan.

Gulnoza Turgʻunboyeva, oʻz muxbirimiz. “Postda”
Toshkent viloyati