Andijon viloyatida Ichki ishlar organlarining Probatsiya boʻlinmalari faoliyati oʻrganilmoqda
2026-01-20 13:50:00 / Yangiliklar
IIV Jamoat xavfsizligi departamenti Probatsiya boshqarmasining ishchi guruhi tomonidan Andijon viloyatida probatsiya boʻlinmalari faoliyatini oʻrganish boʻyicha kompleks chora-tadbirlar amalga oshirilmoqda.
Mazkur oʻrganishlar doirasida ishchi guruh aʼzolari tomonidan Shahrixon, Boʻston va Ulugʻnor tumanlari ichki ishlar boʻlimlari Jamoat xavfsizligi xizmati tarkibidagi probatsiya guruhlarining xizmat faoliyati yaqindan tahlil qilindi. Jumladan, probatsiya xizmati faoliyatini tashkil etish, belgilangan vazifalarning ijrosi, xizmat hujjatlarini yuritish hamda hisobot ishlarining holati oʻrganib chiqildi.
Shuningdek, probatsiya xizmatiga doir soʻnggi yillarda qabul qilinayotgan farmonlar, qarorlar va boshqa meʼyoriy-huquqiy hujjatlarning xodimlar tomonidan qay darajada oʻzlashtirilgani, ularni amaliy faoliyatga tatbiq etish holatiga alohida eʼtibor qaratildi. Bundan tashqari, sohaga joriy etilayotgan zamonaviy raqamli texnologiyalar va axborot tizimlaridan samarali foydalanish darajasi ham oʻrganildi.
Oʻrganishlar yakunida aniqlangan kamchilik va muammolar yuzasidan tegishli taklif va tavsiyalar ishlab chiqilib, masʼul rahbarlar va xodimlarga amaliy koʻrsatmalar berilmoqda.
Ayni paytda Andijon viloyatining boshqa shahar va tumanlarida ham mazkur yoʻnalishdagi oʻrganish ishlari izchil ravishda davom ettirilmoqda.
Andijon viloyati IIB Axborot xizmati