Namangan viloyati hududlarida sodir etilgan jinoyatlar keng jamoatchilik vakillari ishtirokida muhokama qilinib, PQ-1 va PQ-2-son Qarorlari yuzasidan ustuvor vazifalar belgilab olindi
2026-01-20 11:50:00 / Yangiliklar
Oʻzbekiston Respublikasi Prezidentining joriy yil 5-yanvardagi “Respublika mahallalarida xavfsiz muhitni yaratish yoʻnalishida yaxlit, manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ-1-son Qarori ijrosini taʼminlash, uning mazmun-mohiyatini keng jamoatchilik vakillariga yetkazish, shuningdek, hududlarda sodir etilgan oʻta ogʻir turdagi jinoyatlarning kelib chiqish sabablari va omillarini chuqur tahlil qilish maqsadida boshqarma rahbariyati tomonidan tizimli oʻrganish ishlari olib borilmoqda.
Jumladan, boshqarma rahbariyati boshchiligidagi ishchi guruh Chust va Kosonsoy tumanlarida boʻlib, tuman hokimlari ishtirokida qaror bilan belgilangan kriminogen vaziyati ogʻir hamda “qizil” toifadagi mahallalar, shuningdek, oʻta ogʻir turdagi jinoyatlar sodir etilgan Chust tumanidagi “Qorakapa” va Kosonsoy tumanidagi “Bogʻkoʻcha” mahallalarining yettiligi aʼzolari, ushbu hududlarga biriktirilgan masʼul xodimlar hamda tegishli tashkilotlar vakillari ishtirokida kengaytirilgan muhokama yigʻilishlari oʻtkazildi.
Muhokamalar davomida mazkur qarorlar ijrosi va unda belgilangan ustuvor vazifalar yuzasidan tegishli masʼul rahbarlarga aniq topshiriqlar berildi. Shuningdek, oʻta ogʻir turdagi jinoyatlarning oldini olish maqsadida mahalla yettiligi aʼzolarining oʻzaro hamkorligini kuchaytirgan holda tizimli profilaktik tadbirlarni tashkil etish boʻyicha masʼul xodimlarga tegishli vazifalar yuklatildi.
Namangan viloyati IIB Axborot xizmati