IIV ishchi guruhi tomonidan oʻquv-seminar mashgʻulotlari oʻtkazilmoqda
2026-01-20 10:50:00 / Yangiliklar
Oʻzbekiston Respublikasi Ichki ishlar vazirligi tashabbusi bilan IIV masʼul xodimlari, Ichki ishlar vazirligi Akademiyasi hamda Ichki ishlar vazirligi Kriminologiya tadqiqot institutining malakali mutaxassislaridan iborat ishchi guruh tomonidan Xorazm viloyati Ichki ishlar boshqarmasi hamda barcha sohaviy va hududiy ichki ishlar organlarida oʻquv-seminar mashgʻulotlari tashkil etildi.
Oʻquv-seminar mashgʻulotlar davomida Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish boʻyicha yaxlit manzilli ish tizimini joriy etishga qaratilgan qoʻshimcha chora-tadbirlar toʻgʻrisida”gi 1-son va 2-son qarorlarining bosh gʻoyasi, maqsad va asosiy prinsiplari batafsil tushuntirildi. Xususan, mahallalarda jinoyat va huquqbuzarliklarni barvaqt oldini olish, xavfsiz muhitni yaratishda manzilli, tizimli va masʼuliyatli yondashuvni joriy etish tartibi boʻyicha maʼlumot berildi.
Qarorlarda belgilangan maqsadlar — kriminogen vaziyatni barqarorlashtirish, aholi, ayniqsa yoshlar va ayollar oʻrtasida jinoyatchilikning oldini olish, profilaktika ishlarining samaradorligini oshirish hamda ichki ishlar organlari faoliyatini yangi mexanizmlar asosida tashkil etish masalalari keng yoritildi. Shuningdek, qonuniylik, ochiqlik, manzillilik, profilaktikaning ustuvorligi kabi asosiy prinsiplar amaliyot misolida tushuntirildi.
Bundan tashqari, kriminogen vaziyati ogʻir va “qizil” toifaga kiritilgan mahallalarni masʼul xodimlarga biriktirish tartibi, ular faoliyatini muvofiqlashtirish va nazorat qilish mexanizmlari yuzasidan atroflicha izohlar berildi. Ayollar va yoshlar tomonidan jinoyat sodir etilishining oldini olish, ular bilan manzilli profilaktik ishlar olib borish, tarbiyaviy va tushuntirish tadbirlarini kuchaytirish masalalariga alohida eʼtibor qaratildi.
Shuningdek, spirtli ichimliklar va giyohvandlik vositalariga ruju qoʻygan shaxslar bilan ishlash tartiblari, ularni aniqlash, hisobga olish, profilaktik suhbatlar oʻtkazish, ijtimoiy reabilitatsiya hamda moslashuv chora-tadbirlarini amalga oshirish boʻyicha tushuntirishlar berildi. Jinoyat va huquqbuzarliklarning barvaqt oldini olishga qaratilgan ijtimoiy profilaktik chora-tadbirlar ham keng yoritildi.
Seminar jarayonida xodimlarning mavzu yuzasidan qiziqtirgan savollariga ishchi guruh tarkibidagi mutaxassislar tomonidan atroflicha tushuntirishlar berildi.
Mazkur oʻquv-seminar ichki ishlar organlari xodimlarining qarorlar mazmunini chuqur anglab yetishi, ularda belgilangan bosh gʻoya, maqsad va prinsiplarni amaliyotda toʻgʻri qoʻllash koʻnikmalarini shakllantirishga xizmat qildi. Natijada mahallalarda xavfsiz muhitni yaratish, profilaktika ishlarini manzilli va tizimli tashkil etish, aholi tinchligi va jamoat xavfsizligini taʼminlashga qaratilgan ishlar samaradorligi yanada oshishiga xizmat qiladi.
Xorazm viloyati IIB Axborot xizmati