Samarqand viloyati Pastdargʻom tumanida yoshlarni qoʻllab-quvvatlashga qaratilgan uchrashuv tashkil etildi
2026-01-17 07:50:00 / Yangiliklar
Pastdargʻom tumanida Samarqand viloyati Ichki ishlar boshqarmasi boshligʻi general-mayor Toxir Aripov tomonidan uyushmagan yoshlar bilan uchrashuv tashkil etildi. Unda tuman hokimligi va jamoatchilik vakillari hamda tuman yoshlari ishtirok etdi.
Uchrashuvdan koʻzlangan asosiy maqsad — yoshlarni qiynayotgan muammolarni oʻrganish, ularning taklif va tashabbuslarini qoʻllab-quvvatlash, shuningdek, jamiyatda faol, qonunga hurmat ruhida tarbiyalangan avlodni shakllantirishdan iborat boʻldi.
Tadbir davomida viloyat IIB boshligʻi yoshlar bilan yuzma-yuz muloqot qilib, ularning bandligini taʼminlash, kasb-hunarga yoʻnaltirish, boʻsh vaqtni mazmunli tashkil etish masalalariga alohida eʼtibor qaratdi. Shuningdek, yoshlar orasida huquqbuzarliklarning oldini olish, zararli odatlardan yiroq boʻlish mavzularida hayotiy misollar asosida alohida toʻxtalib oʻtildi. Yoshlar oʻzlarini qiziqtirgan savollarga batafsil javoblar oldilar.
Uchrashuv yakunida, tengdoshlariga oʻrnak boʻlib kelayotgan bir guruh faol yoshlar esdalik sovgʻalari bilan taqdirlandi.
Samarqand viloyati IIB Axborot xizmati