O‘zbеkiston Rеspublikаsi Ichki ishlаr vаzirligi

Ommaviy axborot vositasi vakili sifatida aholiga maʼlumotlarni xolis va begʻaraz yetkazib berish yoʻlida faoliyat olib borayotgan har bir ijodkor, jurnalist yoki bloger eng avvalo – tanlagan yoʻli gʻoyat masʼuliyatli va yuqori saviya talab etishini his qilgan holda, omma eʼtiboriga havola etilayotgan har bir axborot uchun javobgar ekanligini toʻliq anglashi darkor.

Aholini axborot nafasidan bahramand etish kabi gʻoyat yuksak ijodiy faoliyatdan, oʻz nafsi yoʻlida foydalanib, oddiy odamlarning muammoli vaziyatlarini chalgʻituvchi informatsion xurujlar orqali bayon etayotgan, jarangdor shiorlar va tahdidlar bilan niqoblanib, tovlamachilik va firibgarlikni kunlik faoliyatiga aylantirib olgan Taftish.uz xodimlarining noqonuniy xatti-harakatlarini bayon etamiz.

Jinoiy guruh yetakchisi Aberayev Gʻayrat Nusratovich 1988-yilda Buxoro viloyatida tugʻilgan. Yillar davomida respublikamiz hududida fuqarolarga nisbatan firibgarlik, tovlamachilik, yolgʻon axborot tarqatish va poraxoʻrlikda vositachilik qilishni kasb qilib olgan bu kimsa, muqaddam,

2013-yilda Shofirkon tuman sudi tomonidan JKning 168-moddasi 2-qismining “b” bandi bilan jinoiy javobgarlikka tortilgan;

2015-yilda jinoyat ishlari boʻyicha Buxoro shahar sudi tomonidan JKning 168-moddasi 1-qismi va 28, 211-moddasi 1-qismi bilan javobgarlikka tortilgan;

Shu yilda Samarqand viloyat sudi tomonidan JKning 28, 167-moddasi 3-qismining “a” bandi bilan 7-yilga ozodlikdan mahrum etish jazosi tayinlanib, amnistiya asosida jazodan qutulib qolgan;

2016-yilda Gʻijduvon tuman sudi tomonidan JKning 168-moddasi 2-qismi “b” bandi, 28, 25 va 211-moddasi 2-qismi “a” bandi bilan 9-yil 6 oyga jazodan mahrum etilib, 2020-yilda muddatidan ilgari shartli ravishda ozod qilingan;

Davlat tomonidan koʻrsatilgan gʻamxoʻrliklarni mensimagan bu shaxs, jinoiy faoliyatini davom ettirib, 2024-yilda Jinoyat ishlari boʻyicha Peshku tuman sudining hukmiga koʻra JKning 168-moddasi 4-qismi “a” bandi bilan javobgarlikka tortilib, axloq tuzatish ishlari jazosi qoʻllanilgan;

Shuningdek, 2025-yil 28-maydagi Jinoyat ishlari boʻyicha Quvasoy shahar sudining hukmiga koʻra, davlat organlari xodimlariga nisbatan “Taftish.uz” OAVsida sharmanda qiladigan uydirmalar tarqatganligi uchun JKning 139-moddasi 3-qismi “g” bandi bilan blogerlik faoliyatlari bilan shugʻullanish huquqidan mahrum qilinib, 1-yil 2 oy ozodlikni cheklash jazosi tayinlangan;

Hozirda probatsiya hisobida ozodlikni cheklash jazosini oʻtamoqda.
Xavfli retsidivist, deb topilgan.

Gʻ.Aberayev “Taftish.uz” OAV rahbari sifatida jinoiy guruh faoliyatiga yetakchilik qilib, sud hukmi bilan internet va telefondan foydalanish taʼqiqlangan boʻlsada, ijtimoiy tarmoqlarda ukasi Gʻanisher Aberayev nomiga soxta profil ochib, faol foydalanib, jinoiy guruh faoliyatini muvofiqlashtirib kelgan.

Jinoiy guruhning aʼzosi Yuldashev Azizjon Baxromjonovich, 1992-yilda Toshkent viloyatida tugʻilgan. Muqaddam sudlanmagan.

A.Yuldashev, ijtimoiy tarmoqlarda oʻzini xalqparvar deb koʻrsatib, aslida esa fuqaro va mansabdor shaxslarga “koʻcha bezorisi” kabi muomalasi bilan goʻyoki haqiqatparvarga barchasi mumkin deya, oʻzini axloqsiz shaxs sifatida namoyon qilib keladi.

Koʻp yillik tanishi boʻlgan, guruh rahbari Gʻ.Aberayevning topshirigʻiga koʻra, “Taftish.uz” niqobi ostida, jinoiy sheriklari D.Nishonov, va M.Eshquvatova bilan birgalikda, muntazam ravishda murojaatchilarning mablagʻi evaziga noxolis, fuqarolarning shaʼni va qadr-qimmatini kamsituvchi videoroliklar tayyorlab, ularni You Tube kanaliga joylash va keyinchalik ushbu videolarni oʻchirtirish evaziga Gʻ.Aberayev orqali tovlamachilik qilish bilan shugʻullanib kelgan.

Ushbu jinoiy harakatlarni, “Chilonzor buyum savdo kompleksi” rahbariyatidan pul undirishda, Namangan viloyati Chust tumanidagi oila shaʼnini bulgʻashda, Toshkent shahrida “Parkent Development” qurilish kompaniyasi obroʻsini toʻkishda, Samarqand viloyatida “Oʻzbegim uylari” qurilish kompaniyasi rahbariyatiga nisbatan tovlamachilik qilishda, amalga oshirib kelgan.

Jinoiy guruhning yana bir aʼzosi Nishonov Dilshod Taxirovich 1998-yilda Toshkent shahrida tugʻilgan. “Taftish.uz” OAVning muxbiri. Shaxsga doir maʼlumotlar toʻgʻrisidagi qonunchilikni buzganligi hamda oʻziga notanish boʻlgan oilaning qadr-qimmati kamsitilishiga olib kelgan yolgʻon axborotni tarqatganligi uchun, sud qarori bilan Oʻzbekiston Respublikasi MJtKning 46¹-moddasi hamda 202²-moddalari bilan javobgarlikka tortilgan. Ikkinchi guruh nogironi.

Maʼlumotlarga koʻra, Gʻ.Aberayev tomonidan aynan nogiron boʻlganligi uchun, xalq fikrini manipulyatsiya qilishda, nuqsoni bilan fuqarolarda rahm uygʻotish, davlat idoralari va huquqni muhofaza qilish organlariga nogironligini vaj qilib, turli bosim oʻtkazish uchun foydalanish maqsadida muxbirlik lavozimiga ishga olingan va jinoiy guruhga qoʻshilgan.

Nogironligi ortidan ushbu shaxsga hech kim chora koʻra olmasligi zaminida jinoiy guruhda “Torpeda” yaʼni pul undiruvchi va davlat organlari xodimlarini qoʻpol muomalasi bilan obroʻsizlantiruvchi vakil vazifasini bajargan.

Jinoiy guruh tarkibida Toshkent shahrida, Toshkent viloyatining Zangiota tumanida, Namangan viloyati Kosonsoy tumanida hamda Qoraqalpogʻiston Respublikasining Toʻrtkoʻl tumanida fuqarolar va tadbirkorlarni obroʻsizlantirish ishlari bilan faol shugʻullanib kelgan.

Ahamiyatli tomoni shundaki, goʻyoki xalq nomidan hukumatga tinmay eʼtiroz bildirish orqali oʻzini qiynalgan fuqaro sifatida namoyish etayotgan ushbu kimsaga va uning oila aʼzolariga davlat tomonidan tizimli ravishda ijtimoiy yordam koʻrsatib kelinadi.

Masalan, 2020-yilda D.Nishonov ota-onasi bilan yashab turgan Chilonzor tumanidagi koʻp qavatli uy kapital taʼmirdan chiqarilib, atrofi toʻliq obodonlashtirilgan.

2024-yilda esa bu oilaga yana gʻamxoʻrlik koʻrsatilib, Davlat rahbarining tashabbusi bilan Yangihayot tumanidan bepul ikki xonali yangi uy taqdim etilgan.

Shuningdek, masʼullar tomonidan onasining shu hududda savdo-sotiq bilan shugʻullanishi uchun ham sharoit yaratib berilib, garchi hech qanday hujjatlarga ega boʻlmasada, insonparvarlik prinsiplari asosida savdo doʻkoni orqali daromad topishiga imkoniyat yaratilgan. Undan tashqari Dilshod Nishonovning ijtimoiy himoyasi ham muntazam ravishda taʼminlab kelinadi.

Jinoiy guruhning yana bir aʼzosi Eshquvvatova Marjona Sherali qizi, 2006-yilda Samarqand viloyatida tugʻilgan. “Taftish.uz” OAVning muxbiri. 2024-yilning aprel oyida, boshqa bir fuqaroning qadr-qimmati kamsitilishiga olib kelgan yolgʻon axborotni tarqatganligi uchun, Guliston shahar sudining qarori bilan Oʻzbekiston Respublikasi MJtKning 202²-moddasi bilan javobgarlikka tortilgan.

M.Eshquvvatova jinoiy sheriklari D.Nishonov, A.Yuldashev va S.Rashidovlar bilan birgalikda 2025-yil oktyabr-dekabr oylarida Namangan viloyati Kosonsoy tumanida, Toshkent shahri va Samarqand viloyati, shuningdek Qoraqalpogʻiston Respublikasi Toʻrtkoʻl tumanida murojaatchilarning mablagʻi evaziga ikkinchi tomonni shaʼni va qadr qimmatini toptovchi videomateriallar tayyorlab, “Taftish.uz” kanaliga joylab kelgan. Aynan shu materiallarni internetdan oʻchirish uchun guruh rahbari Gʻ.Aberayev tadbirkorlardan tovlamachilik yoʻli bilan pul mablagʻlarini undirib kelgan.

Shu bilan birga M.Eshquvvatova 2025-yilning noyabr oyida “Parkent development” hamda Samarqand viloyatidagi “Oʻzbegim uylari” qurilish kompaniyalar haqidagi uydirma materiallarni tarqatish bilan shugʻullangan. Aynan shu materiallarni oʻchirish uchun uning jinoiy sheriklari Gʻ.Aberayev va A.Yuldashevlar tadbirkorlardan tovlamachilik yoʻli bilan pul talab qilgan.

Ijtimoiy tarmoqlarda oʻzini xalqparvar, deya koʻrsatib kelayotgan M.Eshquvvatova, shunchalik haddidan oshib ketganki, hattoki oʻz vazifasini vijdonan bajarayotgan, 2025-yilning noyabr oyida Sirdaryo viloyati hududidagi avtomobillarga gaz quyish shoxobchasi hududida sigaret chekayotgan tartibbuzarga chora koʻrgan mahalla profilaktika inspektorini obroʻsizlantirishga urinib, bularni maqsadi pul ishlash, kabi shaxsning shaʼnini kamsituvchi izohlar bilan aslida yolgʻon boʻlgan va jamoat tartibiga toʻgʻridan-toʻgʻri tahdid soluvchi maʼlumotni qasddan instagram kanaliga joylagan.

Bu kabi oʻtaketgan surbetlikni, ayrim fuqarolar xalq dardini olib chiqish sifatida baholab, blogerni maqtayotganliklarini qanday tushunish mumkin? Vaholanki, oʻsha kuni gaz quyish shoxobchasida 18 ta avtomashina va 50dan oshiq fuqarolar, bir necha ayollar yosh goʻdaklari bilan birga boʻlgan.

Kashanda huquqbuzar esa, boshqa haydovchilar tomonidan tanbeh eshitganiga qaramasdan sigaret chekishni davom ettirgan. Bu kabi yongʻin xavfi yuqori boʻlgan manzillarda bejizga alohida tartib joriy etilmagan!

2024-yilning 17-dekabr kuni Fargʻona viloyatidagi gaz quyish shoxobchasida sodir etilgan ogʻir falokat oqibatida 4 kishi vafot etgani xalqimizning esidan chiqqani yoʻq. U yerdagi portlash ham, zapravkadan sizib chiqqan gaz va ochiq olov chaqnashi oqibatida sodir boʻlganligini eslatib oʻtish joiz.

“Bloger” esa, odamlar oʻlimi bilan bogʻliq boʻlishi mumkin boʻlgan bu kabi ogʻir oqibatni xaspoʻshlab, ichki ishlar organi xodimlarni yomonlab, mazkur jirkanch va xavfli hodisani oʻzining navbatdagi piari uchun ishlatgan.

Ijtimoiy tarmoqlarda oʻzini xalq posboni sifatida namoyon etib kelayotgan, qonun-qonun deya tinmay bong urayotgan M.Eshquvvatova aslida ashaddiy huquqbuzar hisoblanadi.

U haydovchilik guvohnomasiga ega boʻlmasdan turib, davlat raqami 01 797 QKA boʻlgan transport vositasini muntazam ravishda boshqarib yurgan. Yoʻl patrul xizmati xodimlarining tinimsiz ogohlantirishlari hamda qoʻllanilgan jarimalar bu ayolga umuman kor qilmagan. Qoidabuzarlik uchun avtomashina jarima maydoniga joylashtirilganidan keyin ham qonunlarni qasddan mensimasdan yana 90 kun davomida oʻsha transport vositasini boshqarishda davom etib, 14 marotaba yoʻl harakati qoidalarini buzganligi aniqlandi.

Bu qoidabuzarliklari oxir-oqibat jiddiy yoʻl transport hodisasiga olib kelgan. Oʻzini hayotini bir tiyinga ilmaydigan bu kimsaga, hech boʻlmaganda boshqa fuqarolarni hayotini hurmat qilishini tilashdan boshqa iloj yoʻq.

Oson pul va jazosizlik ortidan eyforiyaga berilib ketgan bu ayol, tanishlariga va yordam soʻrab kelgan murojaatchilarga davlat organlari, hokimiyat yoki huquqni muhofaza qilish organlari undan qoʻrqib, barcha ishlarini bitirib berishini, tanqidlari orqali har qanday muammoni hal eta olishini qayta-qayta takrorlab, aholini ishontirishga urinib kelgan.

Hurmatli fuqarolar, muammolaringiz yuzasidan turli firibgarlarga emas faqatgina masʼul davlat organlariga murojaat qiling. Mablagʻingizni litsenziyaga ega yuridik xizmat koʻrsatuvchi mutaxassislar uchun ishlating. Daromadingizni ochiqlik pardasi ortida yashiringan va ommaviy axborot vositasi sifatida niqoblangan ayrim jinoiy guruhlar faoliyatini rivojlantirishga sarflamang!