Jazoni ijro etish departamentining xizmatlari oʻrtasida Vatan himoyachilari kuni munosabati bilan minifutbol boʻyicha “Departament kubogi” musobaqasi oʻtkazildi
2026-01-14 15:15:00 / Yangiliklar
Jazoni ijro etish departamenti sohaviy xizmatlari oʻrtasida "14-yanvar — Vatan himoyachilari kuni" munosabati bilan sportning mini-futbol turi boʻyicha “Departament kubogi” musobaqasi tashkil qilindi.
Qizgʻin va murosasiz bahslar ostida oʻtgan musobaqa ishtirokchilarning jismoniy tayyorgarligi, jamoaviylik ruhi va irodasini namoyon etdi. Final bahsida munosib oʻyin koʻrsatgan departament Tashkiliy boshqarma jamoasi gʻalaba qozonib, musobaqa kubogini qoʻlga kiritdi. Raqibidan biroz ortda qolgan Maʼnaviy-maʼrifiy ishlar va kadrlar bilan taʼminlash boshqarmasi futbolchilari 2-oʻrinni egallagan boʻlsa, Moliya va moddiy-texnika taʼminoti boshqarmasi jamoasi esa 3-oʻringa munosib topildi.
Musobaqa gʻolib va sovrindorlari diplom, medal hamda pul mukofotlari bilan taqdirlandi.
Tadbirda soʻz olgan departament boshligʻi oʻrinbosari Abduvohid Imyaminov shaxsiy tarkibni bayram bilan qizgʻin muborakbod etib, bunday sport bayramlari barcha ishtirokchilarda koʻtarinki kayfiyat uygʻotib, jamoalar oʻrtasida doʻstlik va hamjihatlikni yanada mustahkamlashga xizmat qilishini taʼkidladi.
IIV huzuridagi Jazoni ijro etish departamenti Axborot xizmati