Andijon tumanidagi taʼlim muassasasida yoshlar oʻrtasida jinoyatchilik va huquqbuzarliklarning oldini olish boʻyicha amalga oshirilayotgan ishlar holati oʻrganildi
2026-01-11 09:45:00 / Yangiliklar
Andijon viloyati IIB boshligʻi, polkovnik Sanjar Djabarov Ichki ishlar vazirligiga biriktirilgan Andijon tumanida joylashgan 35-son umumiy oʻrta taʼlim maktabida boʻlib, taʼlim muassasasida amalga oshirilayotgan ishlar bilan yaqindan tanishdi.
Tashrif davomida maktabda oʻquvchilar oʻrtasida jinoyatchilik va huquqbuzarliklarning oldini olish borasida olib borilayotgan profilaktik chora-tadbirlar, shuningdek, taʼlim-tarbiya jarayonida huquqiy madaniyatni oshirishga qaratilgan ishlar muhokama qilindi.
Shuningdek, joriy yilda mazkur taʼlim muassasasida yangi oʻquv binosini barpo etish boʻyicha rejalashtirilgan qurilish loyihasi bilan tanishildi. Yangi binoning qurilishi maktabdagi oʻquv jarayonini yanada yaxshilash, oʻquvchilar uchun zamonaviy va qulay taʼlim muhitini yaratishga xizmat qilishi taʼkidlandi.
Bundan tashqari, maktabning moddiy-texnika bazasini mustahkamlash maqsadida zamonaviy kompyuter jamlanmalari va boshqa zarur anjomlar yetkazib berildi. Bu esa oʻquvchilarning axborot texnologiyalari sohasidagi bilim va koʻnikmalarini oshirish, darslarni interaktiv usulda tashkil etish uchun keng imkoniyatlar yaratadi.
Tashrif yakunida taʼlim muassasasida qonun ustuvorligini taʼminlash, yoshlarni vatanparvarlik va qonunga hurmat ruhida tarbiyalash ishlarini yanada kuchaytirish boʻyicha masʼullarga aniq vazifalar belgilab berildi.
Andijon viloyati IIB Axborot xizmati