IIV JXD Yoʻl harakati xavfsizligi xizmatida “Yoʻl harakati xavfsizligini taʼminlash tizimining bugungi holati: muammolar, sabablar, ilmiy-amaliy hamkorlik va samarali yechimlar” mavzusidagi ilmiy-amaliy anjuman tashkil etildi
2026-01-10 19:45:00 / Yangiliklar
Bugungi kunda yoʻl-transport hodisalarining oldini olishda xalqaro tajriba, ilmiy asoslarga ega boʻlgan zamonaviy metodikalarning oʻrni beqiyos. Shu bois, hozirda soha rivoji uchun yangicha axborot texnologiyalari yordamida tizimni raqamlashtirish barobarida keng jamoatchilik, ilmiy darajaga ega boʻlgan olimlar singari katta malakaga ega boʻlgan mutaxassislarning ham takliflari keng koʻlamda oʻrganilmoqda.
IIV JXD Yoʻl harakati xavfsizligi xizmati maʼmuriy binosida tashkil etilgan davra suhbatida aynan shu jihatlarga keng eʼtibor qaratildi. Ichki ishlar vazirligi tizimidagi taʼlim va ilmiy muassasalar, shuningdek, nufuzli oliy taʼlim muassasalari professor-olimlari ishtirokida oʻtkazilgan tadbir avvalida ayanchli avtohalokatlar aks etgan videorolik namoyish etildi. Shundan soʻng, bugungi kunda avtoavariyalarning oldini olish borasida Xizmat tomonidan amalga oshirilayotgan chora tadbirlar toʻgʻrisida qisqacha maʼlumot berilganidan soʻng, yigʻilganlar ishtirokida yoʻl harakati xavfsizligini taʼminlash sohasidagi mavjud muammolarni chuqur tahlil qilish, ilmiy yondashuvlar asosida samarali yechimlarni ishlab chiqish va amaliyotga joriy etish mexanizmlari muhokama qilindi.
Soha taraqqiyoti uchun olib borilayotgan ilmiy izlanishlar eʼtirof etilib, qizgʻin savol-javob, keng munozaralar davomida kelgusida bajarilishi lozim boʻlgan bir qator ishlar belgilab olinib, ijrosi yuzasidan masʼullarga topshiriqlar berildi.
Bu kabi ilmiy anjumanlar kelgusida yoʻllarda inson xavfsizligini taʼminlash, baxtsiz hodisalarning oldini olish yoʻlidagi muhim qadam boʻlib xizmat qilishi shubhasiz.