Buxoro viloyati IIBda inspektor-psixologlar va profilaktika inspektorlari ishtirokida oʻquv yigʻini oʻtkazildi
2026-01-10 11:55:00 / Yangiliklar
2025/2026-oʻquv yilining 2-choragi yakunlari hamda taʼtil davridan samarali foydalanish maqsadida, umumtaʼlim va oliy taʼlim muassasalariga biriktirilgan inspektor-psixologlar, profilaktika inspektorlari hamda shahar-tuman IIBlarining xotin-qizlar masalalari boʻyicha katta inspektorlari ishtirokida oʻquv yigʻini oʻtkazildi.
Mazkur oʻquv yigʻini xodimlarning kasbiy bilim va amaliy koʻnikmalarini oshirish, xizmat faoliyatini takomillashtirish hamda sohaga oid yangi normativ-huquqiy hujjatlar mazmun-mohiyatini yetkazish maqsadida tashkil etildi.
2026-yil 5–10-yanvar kunlarida oʻtkazilishi belgilangan nazariy va amaliy mashgʻulotlarga sud, prokuratura, sogʻliqni saqlash hamda boshqa tegishli idoralar mutaxassislari jalb etildi. Mashgʻulotlar davomida bolalarni zoʻravonlikdan himoya qilish, himoya orderini rasmiylashtirish, voyaga yetmaganlar oʻrtasida huquqbuzarliklar va giyohvandlikning oldini olish, erta nikoh, suitsid holatlari, “Oila–mahalla–maktab” tizimi, shuningdek xotin-qizlar va bolalarga nisbatan zoʻravonlikka qarshi choralar masalalari yoritildi.
Shuningdek, “e-himoya orderi”, “e-inspektor-psixolog” va “e-voyaga yetmagan” axborot tizimlari bilan ishlash boʻyicha tushuntirishlar berilib, ogʻir toifaga kiritilgan yoshlar bilan manzilli ishlash masalalari muhokama qilindi.
Mazkur oʻquv yigʻini xizmat samaradorligini oshirish hamda voyaga yetmaganlar va xotin-qizlar bilan ishlashda idoralararo hamkorlikni mustahkamlashga xizmat qiladi.
Buxoro viloyati IIB Axborot xizmati