IIV Akademiyasida «Kichik final» mutaxassislik yoʻnalishlari uchun moʻljallangan oʻquv mashgʻulotlari oʻtkazildi
2024-05-16 09:00:00 / Yangiliklar
Ichki ishlar vazirligi akademiyasida taʼlimning samarali mexanizmlari keng joriy qilingan. Shulardan biri «Kichik final» kompleks oʻquv mashgʻulotlaridir.
«Kichik final» mutaxassislik yoʻnalishlari uchun moʻljallangan oʻquv mashgʻulotlari boʻlib, kursantlarning amaliy koʻnikmalarini boyitish va kelgusidagi faoliyatiga moslashishini taʼminlash maqsadida oʻtkaziladi.
Mashgʻulotlar jarayonida bilimlarni amaliy jihatdan qoʻllash, protsessual harakatlarni mustaqil ravishda bajarish, eng muhimi, terkor vaziyatda toʻgʻri qarorlar qabul qilish zarurati paydo boʻladi. Shu bois, «kichik final»ni oʻziga xos sinov maydoniga qiyoslash mumkin.
Kuni kecha kunduzgi taʼlim 2-oʻquv kursi kursantlari ishtirokida navbatdagi mashgʻulotlar tashkil qilindi. Ixtisoslik kafedralari tomonidan oʻtkazilgan tadbirga har bir mutaxassislik yoʻnalishi xususiyatidan kelib chiqib tajribali amaliyotchi xodimlar jalb qilindi.
Kursantlar oʻquv jarayonida egallagan nazariy bilim va amaliy koʻnikmalarini, kasbiy ishtiyoqlarini namoyon etdilar.
Kompleks mashgʻulotlar yakunida amalga oshirilgan ishlar tahlil qilinib, boʻlajak mutaxassislarga zarur tavsiyalar berildi.
Bir soʻz bilan aytganda, taʼlim sifatini oshirishga yoʻnaltirilgan bu kabi yondashuvlar soha uchun malakali kadrlar tayyorlashda muhim ahamiyat kasb etishi tayin.
IIV Akademiyasi Axborot xizmati