O‘zbеkiston Rеspublikаsi Ichki ishlаr vаzirligi

Ichki ishlar vazirligining ishchi guruhi Andijon viloyatning barcha shahar-tumanlarida boʻlib, kriminogen vaziyati ogʻir boʻlgan mahallalarda masʼullar tomonidan olib borilayotgan ishlarning natijadorligi oʻrganildi.

Baliqchi tumani Ichki ishlar boʻlimida amalga oshirilayotgan profilaktik ishlar bilan tanishildi. Tadbir davomida kriminogen vaziyat barqarorligini taʼminlash, mahallalarda jinoyat va huquqbuzarliklarning oldini olishga qaratilgan chora-tadbirlar oʻrganildi.

Xususan, yoshlar va voyaga yetmaganlar oʻrtasida jinoyatchilikka sabab boʻlayotgan omillarga alohida eʼtibor qaratildi. Ularning muammolarini oʻrganish, bandligini taʼminlash hamda jinoyatchilikning ildiz omillarini aniqlash boʻyicha masʼullarga tegishli topshiriqlar berildi.

Tadbir doirasida viloyatning qoʻshni Qirgʻiz Respublikasi bilan bogʻlab turgan “Doʻstlik” chegara bojxona posti faoliyati oʻrganildi. Davlat chegarasi xavfsizligini taʼminlash, bojxona organlari bilan hamkorlikda xizmat samaradorligini oshirish hamda fuqarolar uchun yaratilayotgan shart-sharoitlarni yaxshilash masalalari boʻyicha masʼul rahbarlarning taqdimoti tinglandi. Oʻrganishlar davomida chegara nazoratini kuchaytirish, qonunbuzarliklarning oldini olish va zamonaviy texnik vositalardan samarali foydalanish boʻyicha aniq vazifalar belgilab olindi.

Shuningdek, Ichki ishlar vaziri xizmat burchini ado etish chogʻida halok boʻlgan Xoʻjaobod tumani IIB profilaktika inspektori, katta leytenant Abdurasul Abduvaliyevning oila aʼzolari bilan uchrashib, marhumning jasorati va fidoiy xizmatini yuksak qadrlanishi, xodimning oilasi va farzandlarni doimiy ijtimoiy qoʻllab-quvvatlash davlat va ichki ishlar organlarining eʼtiborida boʻlishi taʼkidlandi.

Ishchi guruh, Qoʻrgʻontepa tumanidagi “Markaziy dehqon bozori” faoliyati bilan ham tanishdi. Bozor hududida jamoat tartibi, savdo jarayonlarining qonuniyligi va narx-navolar barqarorligi oʻrganilib, aholi uchun xavfsiz va shaffof savdo muhitini taʼminlash boʻyicha idoralararo hamkorlikni kuchaytirish zarurligi qayd etildi.

Xonobod shahrining Qirgʻiz Respublikasi bilan chegaradosh hududlaridagi xavfsizlik masalalari ham eʼtibor qaratildi, masʼul rahbar va xodimlarga hududda jinoyatchilikni barvaqt oldini olish, mahallalarda huquqbuzarliklarning oldini olish hamda xavfsiz ijtimoiy muhitni shakllantirish boʻyicha aniq topshiriqlar berildi.

Tadbir davomida, viloyat IIB Jamoat tartibini saqlash xizmati faoliyati oʻrganildi. Jarayonda jamoat xavfsizligini taʼminlash hamda huquqbuzarliklarning oldini olish samaradorligini oshirishga qaratilgan ishlar, shuningdek kinologiya markazi xizmat itlarining hamda otliq xizmatning tayyorgarlik darajasi tahlil qilindi. Oʻrganish yakunlari boʻyicha mavjud kamchiliklarni bartaraf etish va xizmat faoliyatini yanada takomillashtirish yuzasidan tegishli taklif va tavsiyalar berildi.

Respublika ishchi guruhining Andijon viloyati ichki ishlar organlari faoliyatining yil yakuniga bagʻishlangan tanqidiy yigʻilishi boʻlib oʻtdi. Unda Ichki ishlar vaziri, vazirlik sohaviy xizmat rahbarlari, viloyat, tuman va shahar ichki ishlar organlari rahbarlari hamda shaxsiy tarkibi ishtirok etishdi.

Yigʻilishda Andijon viloyati ichki ishlar organlari xizmatining yil yakuni boʻyicha vaziyati, faoliyat samaradorligi, shaxsiy tarkibning kasbiy tayyorgarligi, xizmat intizomi va jamoat xavfsizligini taʼminlash borasidagi ishlar toʻliq tahlil qilindi.

Tadbir jarayonida xizmat faoliyatida yuqori natijalarga erishgan, aholi hamda safdoshlari tomonidan alohida eʼtirof etilgan bir guruh xodimlar, jumladan Buloqboshi tumani Ichki ishlar boʻlimi boshligʻi, Xonobod shahar Ichki ishlar boʻlimi Yoʻl harakati xavfsizligi guruhi katta inspektori, Andijon viloyati IIB Ekspert kriminalistika markazi boshligʻi, Andijon shahri boʻyicha IIO FMB profilaktika katta inspektori, Asaka tumani IIB Jamoat tartibini saqlash guruhi Patrul-post xizmati inspektori Ichki ishlar vazirining buyrugʻi bilan munosib ragʻbatlantirildi.

Shuningdek, faoliyati davomida jiddiy kamchiliklarga yoʻl qoʻygan bir qator rahbar va xodimlarga nisbatan intizomiy taʼsir choralari koʻrildi.

Yigʻilish davomida masʼul shaxslarning axborotlari tinglandi, takliflar koʻrib chiqildi va aniqlangan kamchiliklarni bartaraf etish boʻyicha yaqin istiqbolga moʻljallangan chora-tadbirlar belgilab olindi.