IIV Tashkiliy departamenti rahbariyati akademiya magistraturasi tinglovchilari bilan muloqot qildi
2026-01-04 09:40:00 / Yangiliklar
Ichki ishlar organlarida ijro intizomini mustahkamlash, boshqaruv va nazorat mexanizmlarini takomillashtirish davra suhbatining asosiy mavzusi boʻldi.
Departament rahbari, podpolkovnik Jasur Yusupov soʻz olib, ijrochilik masalasiga eʼtibor qaratdi. Hududlarda oʻtkazilayotgan kompleks tekshiruvlar davomida aniqlangan kamchiliklarni aytib oʻtib, ularning kelib chiqish omillarini tahlil qildi.
Hozirgi sharoitda yuksak masʼuliyat bilan ishlash, faoliyatni tahliliy-tanqidiy baholab borish, istiqbolli strategik qarorlar qabul qilish tizim samaradorligining asosiy mezoni ekanligini qayd etib, tinglovchilarga boshqaruvning zamonaviy tamoyillari yuzasidan tavsiyalar berdi.
Muloqotda magistraturadagi taʼlim jarayonlari haqida ham fikr almashildi. Rahbar kadrlarni tayyorlash tizimini zamon talablari darajasida takomillashtirib borish, amaliyotdagi dolzarb muammolarning ilmiy-amaliy yechimlarini ishlab chiqish, bitiruvchilarning kelgusi faoliyatini monitoring qilib borish, istiqbolli kadrlar zaxirasini yaratish borasida takliflar bildirildi.
IIV akademiyasi Axborot xizmati