“E-material” axborot tizimi orqali roʻyxatga olingan murojaatlar bilan ishlash samaradorligini oshirish masalalari boʻyicha oʻquv mashgʻuloti oʻtkazildi
2026-01-04 09:35:00 / Yangiliklar
Buxoro viloyati IIB boshligʻining oʻrinbosari tomonidan “E-material” elektron axborot tizimi orqali kelib tushayotgan murojaatlarni koʻrib chiqish, ularning ijrosini taʼminlash hamda qonuniy qarorlar qabul qilish holati yuzasidan xizmat yigʻilishi oʻtkazildi.
Yigʻilishda tergovchilar, Axborot markazi, shtab boshliqlari, Huquqbuzarliklar profilaktikasi boʻlimi boshliqlari, navbatchilik xizmati xodimlari, kotibiyat va murojaatlar bilan ishlash inspektorlari, shuningdek, xotin-qizlar masalalari boʻyicha inspektorlar ishtirok etdi.
Taʼkidlanganidek, 2025-yil davomida viloyat ichki ishlar organlariga kelib tushgan murojaatlarning 96,7 foizi jinoyat va hodisalarga oid boʻlib, ularning asosiy qismi “E-material” axborot tizimi orqali roʻyxatga olingan. Xususan, birgina dekabr oyida ayrim hududiy boʻlinmalarga kuniga oʻrtacha 40 tadan ortiq murojaat kelib tushganligi qayd etildi.
Shuningdek, murojaatlar bilan ishlash jarayonida ayrim xodimlarning Jinoyat-protsessual kodeksining 329–330-moddalari, “Jismoniy va yuridik shaxslarning murojaatlari toʻgʻrisida”gi Qonun hamda sohaga oid buyruq va qoʻshma qarorlar talablariga yetarli darajada rioya qilmayotgani koʻrsatib oʻtildi.
Yigʻilish davomida “E-material” tizimi orqali roʻyxatga olingan murojaatlarni maxsus shakldagi yigʻma-jildlar asosida yuritish (“Jondor tajribasi”), murojaatlar ijrosi ustidan kundalik va tizimli nazorat oʻrnatish, ijro va xizmat intizomini mustahkamlash boʻyicha masʼullarga aniq vazifalar va topshiriqlar belgilab berildi.
Yakunda murojaatlar bilan ishlashda qonuniylik, shaffoflik va masʼuliyatni yanada kuchaytirish, fuqarolarning murojaatlari oʻz vaqtida va sifatli hal etilishini taʼminlash ustuvor vazifa ekanligi alohida qayd etildi.