Qashqadaryo viloyatida jinoyatchilikka qarshi kurash va huquqbuzarliklar profilaktikasi masalalari jamoatchilik ishtirokida muhokama qilindi
2026-01-01 11:30:00 / Yangiliklar
Viloyatning Qarshi shahri, Koʻkdala va Yakkabogʻ tumanlarida jinoyatchilikka qarshi kurashish, huquqbuzarliklarni barvaqt oldini olish hamda sodir etilgan jinoyatlarni tahlil qilishga bagʻishlangan muhokama yigʻilishlari oʻtkazildi. Tadbirlarda viloyat IIB boshligʻi polkovnik Abduvoxid Ismoilov, prokuratura, ichki ishlar organlari, mahalla yettiligi, jamoatchilik va tegishli mutasaddilar ishtirok etdi.
Muhokamalarda jinoyatlarning kelib chiqish sabablari tanqidiy va ochiq ruhda tahlil qilinib, ularni faqat jazo orqali emas, balki ijtimoiy, tarbiyaviy va profilaktik choralar orqali bartaraf etish zarurligi taʼkidlandi. Ayniqsa, mahalla institutining roli, jamoatchilik nazoratini kuchaytirish, yoshlar bilan maqsadli ishlash, aholi bilan doimiy muloqotni yoʻlga qoʻyish va ijtimoiy muhitni sogʻlomlashtirish masalalariga alohida eʼtibor qaratildi.
Yigʻilishlar yakunida jinoyat va huquqbuzarliklarning oldini olishda davlat organlari bilan bir qatorda jamoatchilik, mahalla va oilalarning hamjihatligi hal qiluvchi ahamiyatga ega ekani qayd etilib, profilaktika ishlarini yangi yondashuvlar asosida yanada kuchaytirish zarurligi uqtirildi.
Qashqadaryo viloyati IIB Axborot xizmati