Fargʻona viloyati IIB rahbariyati tomonidan Yangi yil bayrami arafasida ijtimoiy va profilaktik tadbirlar amalga oshirildi
2026-01-01 10:35:00 / Yangiliklar
Yangi yil bayrami arafasida Fargʻona viloyati IIB rahbariyati tomonidan ijtimoiy ahamiyatga ega boʻlgan qator tadbirlar amalga oshirildi. Viloyat IIB boshligʻi, general-mayor Azizbek Ikramov boshchiligida ichki ishlar organlari faxriylari holidan xabar olinib, ularning koʻp yillik fidokorona mehnati yosh avlod uchun ibrat ekani taʼkidlandi hamda bayram sovgʻalari topshirildi. Bu kabi ehtirom tadbirlari Fargʻona shahri, Margʻilon va boshqa hududlarda ham davom ettirildi.
Shuningdek, viloyat IIB rahbariyati tomonidan Fargʻona markaziy dehqon bozori hamda Qoʻqon shahrida tashkil etilgan arzonlashtirilgan bayram yarmarkalari faoliyati oʻrganildi. Yarmarkalarda aholi uchun yaratilgan shart-sharoitlar, mahsulotlar sifati va narx-navo barqarorligi, jamoat tartibini saqlash masalalariga alohida eʼtibor qaratildi. Masʼullarga tegishli koʻrsatmalar berildi.
Bundan tashqari, Qoʻqon shahrida shifoxonada davolanayotgan xodimlar holidan xabar olinib, ularga maʼnaviy qoʻllab-quvvatlash koʻrsatildi. Ushbu tadbirlar yurtimizda inson qadrini ulugʻlash, keksalar va xodimlarga gʻamxoʻrlik koʻrsatish tamoyillari amalda izchil taʼminlanayotganini yaqqol namoyon etdi.
Fargʻona viloyati IIB Axborot xizmati